Recientemente Organo Ehecutivo AZV a tuma nota di e conferencia di prensa di señor Ricardo Croes y Fundacion SIKI tocante un situacion dificil cu un di nos aseguradonan ta pasando aden. Den dicho conferencia di prensa señor Ricardo Croes y señor Jayburtt Dijkhoff ta menciona cu Organo Ehecutivo AZV ta condena e hoben yiu na un morto prematuro.
Den e caso specifico aki, obviamente nos no por responde den detaye, pasobra ta regarda datonan priva di un pashent y referiendo na un peticion di e asegurado cu a keda entrega na AZV riba 7 di juli 2026. Loke si nos por comparti, ta cu e caso a haya su debido atencion; a propone un plan di tratamento; a bay Colombia te bin bek y a informa e asegurado ampliamente di kico si ta posibel y kico no dentro di cobertura di AZV. Tur esaki a sosode como resultado di evaluacion di comision di oncologia di Aruba (comision HOH), comision Commissie Grensoverschrijdende Zorg (CGZ) y como tambe di comision di oncologia (CTIC) di Colombia.
Sinembargo, despues di tuma nota di e acusacionnan ireal di parti di señor Ricardo Croes y Fundacion SIKI, nos di Organo Ehecutivo AZV ta comparti un biaha mas informacion tocante e proceso di cuido medico den exterior cu meta pa trece claridad tocante e proceso y cobertura.
Cuido den exterior
Aunke Aruba tin hopi specialismo medico, por sosode cu bo ta bira malo y haya un malesa pa cual na Aruba no tin e experticio medico pa por trata bo. Bo specialista ta informa bo tocante esey y ta consulta cu bo kico ta su plan di tratamento; referiendo cu dokter lo splica kico ta e peticion cu e lo bay haci na AZV. Na momento cu bo ta di acuerdo cu loke bo dokter ta propone, e ora ey su persona ta bay haci e peticion na AZV pa bo haya un tratamento medico specifico den exterior. Solamente cu un aprobacion adelanta di AZV, e gastonan di cuido medico den exterior ta wordo cubri. Criteria den e ley di AZV pa por aproba un peticion ta cu ta cu e tratamento ta uno medicamente necesario cu ta ‘comun’ dentro di e specialismo medico, cu ta cay bou di e cobertura di AZV y cu e no por wordo duna na Aruba mes. Esaki ta nifica cu tur tratamento cu ta den esfera di estudio y investigacion experimental no ta cay bou di e cobertura di AZV.
Comision CGZ
E peticion ta wordo evalua door di un comision medico independiente, esta e “Commissie Grensoverschrijdende Zorg” (CGZ). E comision aki ta evalua a base di dos
punto: esta si e tratamento cu ta wordo pidi ta medicamente necesario, y si e tratamento cu ta wordo pidi no por wordo haci na Aruba.
Pa casonan di oncologia, es decir pashentnan cu malesa di cancer, ta conta cu prome cu e peticion yega comision CGZ, e casonan mester a wordo consulta cu e comision di oncologia di Aruba. ta cay bou di e cobertura di AZV y ta uno cu
Aprobacion
Ora cu bo haya un aprobacion di AZV, esaki ta nifica cu AZV ta regla e cita, biahe y estadia pa e asegurado y su eventual acompañante social. E asegurado ta bay e pais cu AZV ta indica. E tempo pa warda pa haya un cita ta depende di e cantidad di luga cu tin disponibel na e hospital. Ora bo tin un aprobacion, AZV ta cubri: pasashi (ida y buelta) di e pashent y di un acompañante social, e gastonan medico (e.o. ingreso den hospital y e operacion y testnan necesario), un compensacion pa hotel den forma di un carta di garantia di AZV y un aporte (financiero) pa yuda den e gastonan di cuminda di e pashent. Dependiendo di e urgencia di e tratamento necesario, lo determina con lihe e asegurado ta bay exterior. Generalmente e biahe ta pa medio di un avion comercial y 1 of 2 dia prome cu e 1e cita. Den caso di hopi urgencia a base di e stuacion medico di e asegurado, un air ambulance ta wordo regla.
Unabes den exterior
Na momento cu un asegurado acepta pa bay exterior via AZV ta sali for di e punto di bista cu ta totalmente di acuerdo cu e condicionnan di AZV y e tratamento proponi na momento cu a haci e peticion. Pues unabes cu e asegurado ta den exterior, e ta ricibi e tratamento medico cu a keda aproba. Por tin casonan caminda entre e citanan mester warda un par di dia. Esaki por ta necesario segun protocol medico of pa motibo cu falta mas test adicional.
Otro scenario
Tambe, por sosode cu na yegada den exterior, ta resulta cu e asegurado (pashent) por
tin mas complicacion y of otro malesa pa cual mester pidi aprobacion adelanta pa por wordo cubri for di e Fondo di AZV. E ora e situacion ey ta wordo evalua di nobo door di AZV den comunicacion cu e specialista tratante di Aruba. Durante di e tratamento den exterior e contacto entre e hospital den exterior, AZV y e specialista di Aruba ta keda. Asina por constantemente evalua e situacion y ora ta necesario por adapta e aprobacion. Ora e asegurado keda cla cu tratamento, ta regresa Aruba bek.
Si acaso e asegurado dicidi cu e no kier tuma e tratamento mas, e ora e asegurado mester regresa Aruba bek. Tur esaki ta keda comunica adelanta na e asegurado y su acompañante social.
