Partido Movimiento Electoral di Pueblo (MEP) a finalisa relato anual y financiero pa aña 2021. Den e relato ta duna informacion di kico tabata entradanan y gastonan di partido durante aña 2021.
Como iniciativa di fraccion di MEP, ley di financiamento di partidonan politico a cambia na aña 2020. Desde e cambio ey a bin diferente cambio entre otro, cu partidonan politico mester raporta y publica informacionnan financiero di e partido. E ley aki a drenta den efecto 1 di januari 2021 Durante di eleccion mester a cumpli cu parti di e publicacionnan y dia 1 di februari tambe tabata un fecha importante pa publica donacionnan cu a wordo haci pa partidonan politico. Prome cu 1 di april, cada partido politico mester entrega su relato anual y un relato finianciero di e aña anterior na conseho supremo electoral.
Prome Minister Evelyn Wever – Croes lider di Partido MEP a splica cu den e relato ta duna informacion y relato financiero di kico tur a tuma luga na aña 2021. E aña ey tabatin varios actividad como cu tabata aña di eleccion y tabatin fundraising, rifanan, workshop, a traha programa conmemorativo pa aniversario di partido y mas.
“Pa nos partido e transparencia y bon finansa den partido ta hopi importante. Si berdad bo kier goberna un pais y forma parti di un gobernacion, bo tin cu goberna e pais na forma financieramente saludabel y bo tin cu cuminsa na bo partido.”
Por ultimo den nomber di MEP ta gradici tesorero saliente sra. Setty Christiaans – Yarzagaray pa e trabou cu el a despelega den su rol como tesorero di partido y cu por a cumpli prome cu e deadline di 1 di april, pa entrega e relato financiero y relato anual.
Partido MEP ta yama danki tambe na lider di partido Premier Wever – Croes pa tur e empeño y trabou cu a haci. Asina MEP ta demostra cu ta cumpli cu tur regla y proposicionnan cu ta trece dilanti y mustra cu e partido ta traha den transparencia y cu e parti financiero a keda bon regla.
