Manera nos tur, Scouting Aruba a conoce retonan den su programa, y nos tambe mester a adapta pa por a sigi funciona.
Pa proteccion di tur su miembronan, nos NO por a sigui cu actividad presencial, e ora a opta pa bay virtual.
Cursonan mester a sigui manera cu a keda programa, durante e pandemia aki, pa prome biaha den historia Scouting Aruba a pasa over na duna curso basico virtual.
Nos por mira atras na un curso exitoso, y nos lidernan nobo a haya e oportunidad pa pasa nan curso, y recientemente a haci entrega di certificadonan na nos cede, na esnan cu tabata por, cu tur e protocol cu DVG ta exigi.
Nos kier a gradici tur cursista cu a dedica nan fin di siman na e curso cu tabata basta intensivo. Masha pabien na tur cu a logra haci nan compromiso y cu por a ricibi nan respectivo certificado.
Tambe nos kier a gradici nos ekipo di facilitadornan cu a prepara y duna e curso aki. Prome cu aña 2020 finalisa, nos kier bisa danki na tur y cada un di nos miembronan cu ta traha duro na formacion informal di nos muchanan den nan respectivo gruponan, un trabou incansabel cu e solo meta pa brinda lo mehor na nos muchanan.
Na e ekipo di facilitadornan, pa duna tur cu tin pa forma nos lidernan brindando nan un curso di calidad y riba nivel pa asina nan por tin e conocemento y material necesario pa por pasa esakinan pa nos muchanan.
Na e directiva cu ta haci nan maximo pa tur cos cana bon y dirigi e organisacion na un miho manera posibel.
Mi kier tuma e oportunidad pa desea tur Grupo, tur lider, mucha y hobennan, team di facilitadornan, mayornan y boluntarionan, directiva y tur cu ta apoya y sostene nos organisacion un Bon pasco y un Aña Nobo yena cu paz, dicha y prosperidad pa un y tur.
Cu den 2021 nos por encontra otro bek completamente bon di salud y yen di animo y energia pa sigui traha na bienestar di nos muchanan.
