Docentenan di diferente scol y (studiantenan na) IPA a sigui un curso pa stimula lesamento bou di nos muchanan riba 8, 9, y 10 di maart. E proyecto aki a wordo haci posibel door di Biblionef Nederland conhuntamente cu Biblionef Aruba, Biblioteca Nacional Aruba, y cu financiamento di Stichting Lezen. E meta di Biblionef (www.biblionef.nl) ta pa yuda tur mucha, sin haci distincion di nan situacion personal, siña conoce na un edad hoben e alegria di lesamento. Esaki cu e proposito pa crea un amor pa lesamento pa e resto di nan bida.
E docentenan cu a participa na e curso a ricibi 3 training practico di Bianca Versteeg di centro di enseñansa NVT (Nederlands als Vreemde Taal)/ de Taalkoffer na Biblioteca Nacional Aruba. Durante e training e docentenan a ricibi guia riba formanan nobo di traha y tecnicanan cu por wordo implementa den klas. Pa facilita e docentenan y stimula nan pa implementa e conocemento nobo den nan lesnan, participantenan a ricibi for di boluntarionan di Biblionef Aruba, Carla van Eerden y Sandra Postma, un pakete di ocho buki.
Versteeg ta remarca cu muchanan no por lesa tur cos riba nan mes, pero ta danki na e ehercicionan di nan docente, e curiosidad di e studiante ta wordo stimula. N’e forma ki nan habilidad di scucha, lesa, y papia ta wordo aumenta. Segun Versteeg ta danki na buki di mucha y storianan, habilidad di idioma por wordo desaroya y mehora na un forma educativo y leuk.
Otro luna e curso lo continua online. Tambe lo tin un encuentro organisa pa diferente guia local pa yuda scolnan establece sea un biblioteca of otro actividadnan cu ta stimula e motivacion pa lesa bou di nos muchanan.
Pa mas informacion por tuma contacto cu Carla van Eerden y Sandra Postma (Biblionef Aruba) na aruba@biblionef.nl
