Curt Harms y su companianan ta wordo acusa di a soborna Benny of haci intento di soborno, pa asina por a haya tereno of facilidad diparti Gobierno pa su proyecto di hotelnan.
Mientras cu Curt Harms tabata manda mas cu 100 mil florin den fundacion di Benny, e tabata reuni cu Benny pa pidi tereno, tanto den Caya pa traha un Mainstreet Hotel, como tambe tereno na waf y dilanti Divi Phoenix.
Harms ta menciona cu e facilitador cu tabata hiba y trece respondi ta un tal Lionel.
Benny a nenga, hungando loco, cu e no sa cu Curt Harms a deposita 100 mil florin ni tampoco tabata sa cu ta compania di Harms. Te hasta despues di campaña, ainda Curt Harms tabata deposita placa den cuenta di Benny su fundacion.
Segun Curt a declara dilanti huez, cu Benny tabata bon na altura, pasobra el’a reuni cu Benny.
Ariba huez su pregunta: dicon bo a sponser Benny asina hopi placa? El’a contesta cu ta pasobra el’a gusta Benny su trabao. Benny a haci hopi pa infrastructura.
Tambe a confronta ambos for di unda nan a conoce otro: Aki tambe tin un decrepancia. Segun Curt Harms e conoce Benny desde 30 aña pasa via partner di Benny cu a traha logo. Di otro banda Benny a bisa di a conoce Curt Harms na momento cu Harms kier a traha un hotel den Centro di Cuidad.
A puntra Harms si el’a sponser otro partido, pa cual el’a contesta cu no, solamente AVP.
E caso aki ta relaciona e ora unda cu Harms a haci intento pa move Benny pa wordo acomoda cu tereno pa un di su projectonan cu e tabata atende. Cu nada a bay dor, ta depende di varios factor, entre otro kisas cu Harms lo no a haya financiamento di banco, por ehempel. Sinembargo e intencion ta hopi cla.
