Diahuebs ultimo Defensa y Damen Workboats a firma un contrato pa construccion di tres boto nobo di patruya di tamaño mediano pa Wardacosta di Caribe Hulandes. E contrato a keda estableci siguiendo un procedura di destaho. E cutternan nobo lo reemplasa esunnan actual den Caribe cual ta den uzo pa mas di 25 aña. Ta anticipa cu e cutternan nobo lo ta operacional na cuminsamento di 2029. E cutternan cu Defensa ta cumpra pa Wardacosta lo ta responsabel pa entre otro vigilancia, detencion y asistencia maritimo riba laman den e parti di Caribe di Reino. Esaki ta inclui tareanan di polis, control di frontera, patruyanan y operacionnan di busqueda y rescate riba laman.
Botonan mas grandi y moderno pa Wardacosta
E cutternan actual, Jaguar, Panter y Poema a drenta den servicio na fin di añanan 1990. E botonan aki di Damen di e marca Stan Patrol 4100 ta hasiendo trabounan confiabel pa añanan. Sinembargo debi na nan edad, mantencion y gastunan ta birando mucho halto. Pesei nan lo ser reemplasa pa un generacion nobo di botonan di patruya. E cutternan nobo di e marca Stan Patrol 5009 ta aproxmadamente 50 meter largo loke ta haci nan mas grandi cu esunnan actual. Esaki ta importante debi na e condicionnan tin biaha extremo riba e laman di Caribe. E botonan nobo tambe lo ta ekipa cu sensornan moderno, manera radar avansa y camaranan infracora. Esaki ta permiti e tripulacion mantene un vigilancia efectivo hasta durante oranan di anochi of na momento cu tin mal visibilidad. Esaki ta oumenta e efectividad operacional di Wardacosta locual ta fortalece su abilidad pa ehecuta su tareanan.
Botonan cu ta intercepta mas grandi y mas lihe
Banda di e cutternan, Damen ta suministrando tambe cuater boto pa intercepta. Cada cutter lo tin un di e interceptornan aki na bordo. Nan ta destina pa intercepta botonan di contrabanda rapido, e asina yama ‘go fast’. E ‘go-fast’ nan hopi biaha ta ser uza pa transporte di droga den Caribe. Tambe lo tin un boto pa intercepta extra disponibel pa rotacion di entrenamento y na momento di mantencion. E botonan nobo aki lo ta mas grandi cu esunnan actual y pesei nan lo mantene nan velosidad mucho mas miho den olanan haltu. Cu e yegada di e cutters y e botonan pa intercepta nobo Wardacosta ta adkiriendo equiponan moderno cu ta miho adapta na su tareanan.
