Un introduccion oficial na Gabinete di Gobernador, ministerio como tambe na diferente instancia, a tuma luga e siman aki pa e directiva nobo di board di Dutch Caribbean chapter di e organizacion di security internacional ASIS International. 

Miembronan di e directiva nobo di ASIS a reuni cu Excelencia Gobernador Alfonso Boekhoudt, Minister Rocco Tjon como tambe director di ATIA Herrick Henriquez, pa informa y introduci na nan e board nobo y alaves elabora riba desaroyo y meta cu nan organisacion tin den mente pa introduci na Aruba y nos region.

Y directiva di e board ta consisti di Aaron Antersijn (Presidente), Marlon Richardson (Vice-Presidente), Urvin Werleman (Tesorero) y Robert Candelaria (Secretario). Meta di e board ta pa eleva e nivel di e sector di siguridad trahando hunto cu gobierno, organisacion y gremionan den nos comunidad, haciendo uzo di training y certificacion pa concientisa nos comunidad cu seguridad ta un parti esencial y vital y ta exigi hopi mas preparacion cu loke tin ainda. E sector di siguridad den nos region ta hopi grandi, cu un cantidad grandi di hende ta labora cada dia, teniendo nos isla, nos empresa y nos viviendanan mas sigur posibel. 

Otro meta cu e board nobo di ASIS tin, ta pa trece e sector gubernamental di husticia y esun priva di siguridad mas cerca di otro. Haciendo esaki lo logra pa esnan encarga cu nos siguridad ta bay tin hopi mas wowo, orea y mente trahando hunto pa haci nos un pais y un destinacion pa nos bishitantenan mas sigur posibel. Por logra metanan asina solamente ora traha hunto cu metanan comun. 

ASIS International ta un organisacion di siguridad internacional y ta enfoca hopi riba e tereno di maneho di siguridad trahando hunto cu diferente chapters local rond mundo, di cual nos ta orguyoso di por ta un di esnan mas hoben, pero sigur mas innovativo y motiva pa crece y concientisa. 

Kier logra un colaboracion entre pais Aruba y e organisacionnan gubernamental y no-gubernamental caminda lo brinda oportunidad den forma di curso y certificacion pa profesionalnan. Lo enfoka riba tur area di seguridad y no solamente siguridad fisico pero sigur tambe lo enfoca pa eleva e nivel di siguridad riba e area cibernetico conoci como “cyber security”. 

Na mes momento a amplia riba e tema di introduccion di protocol entre husticia y e sector di seguridad pa tur tin nan bista den e mesun direccion cu meta y prioridad pa combati criminalidad. ASIS ta ofrese na e gremio comercial e oportunidad pa traha hunto pa eleva e nivel di siguridad riba nos isla y mira con por ta un balor agrega significativo den siguridad general di nos pais. Di igual manera a brinda tur informacion na su Excelencia Gobernador Alfonso Boukhoudt durante un audiencia na Gabinete di Gobernador y na e otro bishitantenan. Por spera cu e board lo ta haciendo reunionnan similar den futuro sercano na gobiernonan y partners den nos región.

LEAVE A REPLY

Please enter your comment!
Please enter your name here