Kantante Daicy J ta bek ku un otro interpretashon romántiko titula ‘HEY PLAYER’, unda amor propio, saka foi eksperensianan di bida, ta para sentral. E protagonista, interpretá pa Daicy J mes, ta na un punto den su bida ku e ke eksperensia pas i trankilidat, unda e ta moviendo riba un frekuensha positivo.
Daicy J ta ilustrá den e videoclip vibrante, ku a keda graba na Hulanda i Spaña, tur e motibunan balido pa e ninga di drenta un relashon nobo ku un persona ku obiamente no ta vibrando riba mesun frekuensha ku ne. Atrobe DAICY- J ta kolaborá ku Twins Films kende a dirigí i produsi e videoclip di ‘HEY PLAYER’.

‘HEY PLAYER’ ta un zouk ku infuensianan di pop, skibí, komposita i areglá pa e talentoso produktor Raniar Elizabeth. E konosido músikonan Ray Bass i Albert Windster, kende respektivamente a toka bas i piano, tambe a kontribuí ku nan talento riba e kansion aki. Durante e período di e pandemia di COVID 19, unda diferente toke de keda a keda imponé riba nos islanan, i tur fiesta i presentashon ‘live’ a keda suspendé, Raniar a enfoká riba skibimentu i su trabounan den studio. Ela usa komo fuente di inspirashon su propio eksperenshanan di pasado, pero tambe susesonan ku e tabata opserva diariamente serka otro persona.

Mas di DAICY J

Na 2020, Daisy Janga, mihó konosí komo kantante DAICY- J, a hasi su reintrodukshon musikal e bachata romántiko ku ‘COMO DUELE ENAMORARSE’, e di tres single di e talentoso kantante. Despues di su debut na 2013 ku ‘Mi Ke Mas’, un Zouk melódiko ku a hasi hopi furor riba nos islanan, Daisy a muda pa Hulanda pa kontinuá su estudio. DAICY- J ta bin di un famia musikal, entre otro su ruman Omar Janga, mihó konosí komo Buchi, kende tambe ta un gran talento. Asina DAICY- J forma parti di diferente banda, manera esun di su mentor Edsel Juliet, ku ta toka entre otro ritmo kombiná, merengue, salsa, bachata i tambe muzik krioyo.

Na 2020, Daicy J a kolaborá ku Quincy Comenencia riba bachata ‘COMO DUELE ENAMORARSE’, pa despues na mart 2022, e dediká e zouk titulá ‘MI TAMBE TA HENDE’, na defuntu produktor Dorisello ‘Chello’ Ignacio, mihó konosí komo UltraBeatz. E produktor talentoso a areglá i produsí e kantika pa Daicy J. Ultrabeatz a laga su marka den farándula antiano ku produkshonnan pa, entro otro, Kaliber, Edsel Juliette, Francisco Pena y La Banda, Black Joker, Teddo Juice i JR Manuel.

Semper un artista kalkula, Daisy ta tuma su tempu pa skohe ken e ta kolaborá ku ne, i e kimika artístiko entre Daicy J i e produktornan ku e ta traha ku ne, ta produsí kansionan inolvidabel. Raniar a skohe Daicy J komo intèrprete pa ‘HEY PLAYER,’ basá riba nan amistat di basta tempu, tantu riba nivel musikal komo personal. Segun Raniar, for di e momentu ku ela skibi e prome kuplèt, e mester a hari, paso ela bisa su mes ku, ‘e kos aki parse Daisy.’

E video clip di ‘HEY PLAYER’ ya ta disponibel riba YouTube i pa mas informashon bo por bishitá DAICY- J su página di Facebook.com/Djsjanga i Instagram@Daicy_j. Korda pidi pa e single ‘HEY PLAYER’ na tur radio emisora i televishon popular riba nos islanan i keda pendiente di futuro anunsio.

‘HEY PLAYER’ YOUTUBE: https://youtu.be/bhWNEHuukpM

LEAVE A REPLY

Please enter your comment!
Please enter your name here