Un bunita campaña semper ta cuminsa cu un simpel idea y iniciativa di un of mas persona. Den e caso aki, 131 Aruba a tuma e iniciativa y a manda S.V. Dakota un invitacion pa participa den un campaña en conexion cu N.V. ELMAR, pa promove conscientisacion di e derechonan di mucha y salud mental bou di nos muchanan y hobennan. E proyecto aki a haya e nomber di ‘Dakota in Blue’.
E campaña ‘Dakota in Blue’ ta enfatisa e importancia di salud mental, specialmente entre hobennan masculino, mirando datos di estudio y literatura Internacional, unda ta indica cu principalmente hende homber tin mas dificultad pa busca ayudo pa problemanan di salud mental. Un tema cu S.V. Dakota sigur tin na pecho pa bienestar di su miembronan y tur hende rondo di nan.
S.V. Dakota ta un organisacion deportivo caminda 200 mucha homber y mucha muher ta practica deporte. For di inicio di e organisacion (1947), S.V. Dakota ta hunga den su colornan tradicional cu ta geel cu preto. Pero pa e luna di november 2025, S.V. Dakota ta cambia su colornan geel cu preto pa e color blauw. ‘Dakota in Blue’ ta encera cu S.V. Dakota division di honor y U20 lo hunga den uniform color blauw den e luna di november, cu ta e color oficial di
derechonan di mucha y di N.V. ELMAR.
S.V. Dakota ta sumamente contento di por forma parti di e colaboracion entre 131 Aruba y N.V. ELMAR y asina hunto conscientisa e comunidad di Aruba tocante salud mental y mas importante, unda y con pa busca ayudo. Den mesun rosea, S.V.Dakota ta manda felicitacion pa 131 Aruba cu ta cumpli 26 aña invertiendo den nos muchanan y hobenan di Aruba y pa N.V ELMAR cu ta celebrando 75 aña iluminando Aruba.
S.V. Dakota ta gradici su sponsornan APEX, Fast Delivery Services, Café the Plaza, Gravenstijn-Marchena Attorneys at LAW, Solid Solutions, Amast, PKF, Innova, Mr. Exhaust Repairs, Car Quest Auto Parts Aruba y KIA pa kere y inverti den e muchanan y hobennan y asina hunto crea un ambiente saludabel pa un y tur.
Pa mas informacion tocante e campaña di conscientisacion ‘Dakota in Blue’, por tuma contacto cu 131 Aruba via nan website of medianan social. Si bo kier conoce nos organisacion mas di cerca, por check nos Facebook: https://www.facebook.com/sportverenigingdakota.
