Durante e Common Good Conference, representante di Bario Dakota, Mitchell Kock a comparti su experencia y vision riba e Memorandum of Understanding (MOU) cu a firma entre Gobierno di Aruba y diferente bario riba isla. E acuerdo ta marca un compromiso concreto pa traha hunto riba proyectonan comunitario y desaroyo sostenibel na nivel di bario.
Segun Kock, e MOU ta un paso importante pa atende cu e retonan cu barionan a enfrenta den pasado y pa sigui cu direccion di proyecto cu ta beneficia comunidad. Kock a enfatisa cu e acuerdo ta crea espacio pa stop problemanan hereda y pa empuha iniciativanan cu ta fortalece participacion di e habitantenan di e bario.
“Esey ta un bon paso pa comunidad, pa bario di Dakota y tambe pa otro barionan di pais,” segun Mitchell Kock.
Den su testimonio, e representante a subraya cu e acuerdo ta permiti pa empuha proyectonan specifico na momentonan oportuno, segun necesidad di bario. Pa Dakota, e enfoke ta riba su identidad cultural y social: un bario conoci pa musica y deporte, cu un rikesa di talento local y historia.
Kock a menciona e idea di un museo di y pa Dakota, cu lo sirbi como un espacio pa honra e musiconan y deportistanan cu a destaca y a contribui na identidad di e bario. Segun Kock, esaki ta un manera pa preserva memoria y traspasa orguyo comunitario pa generacionnan nobo.
A pesar di su densidad den poblacion y desafio social cu a surgi den pasado, Dakota ta keda describi como un bario vibrante, cu hopi hende, hopi energia y cu gran potencial. Segun Mitchell Kock, cu colaboracion entre Gobierno y comunidad, e bario por sigui crece den un manera positivo y inclusivo.
E firmamento di e MOU ta reafirma e idea cu e bon comun ta construi den colaboracion cercano entre Gobierno y barionan, caminda vision, compromiso y accion concreto ta uni pa fortalece bienestar comunitario riba Aruba.
