Diadomingo marduga pa mas o menos 2:45 Jeep di polis cu mester controla costa por poco a hay’e envolvi den un accidente frontal.
Esaki tawata den area di West Punt. Mesora nan a reaccion y a bay tras di e auto cu tawata coriendo cu velocidad sumamente halto.
Den e bocht unda cu ta Tierra del Sol, nan lo a mira stof y ey nan a bin topa cu e auto cu a hera dal frontal contra nan.
E auto a bolter y kibra den dos. Ta trata di un Nissan Skyline color shinishi. Den e vehiculo tawata tin dos persona. Polis ta topa cu e hoben chauffeur cu ta bisanan cu den e auto tin un persona mas, esta un dama hoben.
Mesora ta pidi pa ambulance cu urgencia, na yegada di Paramediconan mucho nan no por a haci debi cu e dama hoben ya a fayece, posiblemente al instante.
Asina e marduga a cuminsa pa autoridad, unda cu tur esnan concerni mester a wordo informa pa yega e sitio.
Brandweer tamba e yega, pa yuda saca e dama hoben for di locual a resta di e Skyline.
Polis di trafico a detene e hoben chauffeur, no paso e tawata bou influencia pero pa core auto iresponsabel y ocasiona morto di un persona.
Rond di 5’or dokter ta constata morto di e dama y segun nos a compronde e curpa lo a ser tuma den beslag pa mas investigacion.
Cu e accidente aki Aruba ta conoce su di 7 morto den trafico, den un tempo relativamente cortico.
E sitio unda e accidente a sosode a permanece cera pa basta ora, debi cu polis a haci un investigacion basts rigoroso.
Te na momento di e articulo aki, polis no a duna informacion di ken e victima ta debi cu no a haya niun identificacion Aruba dje.
Nos ta manda di awor caba palabra di condolencia na famia dia e fayecido.
