ORANJESTAD – Awe mainta, despues di e sentencia di e tres trahadornan di KIA, Hues a condena dos dama, kendenan tambe ta envolvi den e caso di pasamento di droga, cellular y otro cosnan den KIA.
SOLO DI PUEBLO por a compronde cu e damanan J.L.H. y M.L., tabata haya instruccion for di nan pareha cu ta sera den KIA. E paketenan tabata bay pa e acusadonan Geerman y Lares. Aunke cu Lares ta desmenti, Hues ta haya cu tin suficiente prueba.
Tratamento di e casonan aki a tuma lugar siman pasa, caminda Hues a palabra cu ayera mainta e lo sera tratamento di e caso y dicta sentencia di biaha. Cada caso a wordo trata separa.
HIBA DROGA, CELLULAR PA CUIDADORNAN DI PRESO
Durante tratamento di e casonan, a sali na cla con J.L.H. y M.L. tabata contact e trahadornan di KIA pa hiba e paketenan pa nan. J.L.H. y M.L. a bisa den Corte cu nan tabata bay busca e paketenan serca otro persona cu tabata prepara esaki y cu nan no sa kico realmente tabata e contenido. Hues a cuestiona e hecho cu por bien ta tambe cu por a hiba arma den KIA.
M.L. na yoramento den sala di Corte tabata bisa cu el a wordo menaza door di su pareha cu si e no cumpli e lo mira kico lo pasa.
EXIGENCIA DI FISCAL
Fiscal a haya e damanan culpabel y a exigi pa J.L.H., 270 dia di prison di cual 81 dia ta condicional cu 3 aña di prueba. Tambe Fiscal a exigi 120 ora di trabao pa comunidad y si no cumpli cu esaki e lo mester bay 60 dia sera. Pa M.L., Fiscal a exigi 270 dia di prison di cual 65 dia ta condicional cu 3 aña di prueba. Tambe Fiscal a exigi 120 ora di trabao pa comunidad y su no cumpli lo mester bay 60 dia sera.
SENTENCIA
Hues ta haya J.L.H. y M.L. culpabel di a cumpra e trahadornan di KIA y cu nan ta complice di pasamento di droga, cellular y otro cosnan. Hues a bisa cu e no ta bay tene na cuenta e menaza cu M.L. tabata haya for di su pareha den KIA pasobra no tin suficiente prueba di esaki.
Pa cu e castigo, Hues a bisa cu e ta tene cuenta cu seriedad di e caso. Hues a bisa cu J.L.H. y M.L. a yuda cumpra trahadornan di KIA y diferente biaha a haci esaki. Hues a tene cuenta cu ta promer biaha cu nan ta cay sera.
Hues a condena M.L. na 90 ora di trabao of 45 dia sera. Tambe Hues a condena M.L. na 270 dia prison di cual 65 dia ta condicional cu 3 aña di prueba.
Hues a condena J.L.H. igual na loke Fiscal a exigi esta, 120 ora di trabao pa comunidad y si no cumpli lo mester bay 60 dia sera. Tambe Hues a condena J.L.H. na 270 dia di prison di cual 81 dia ta condicional cu 3 aña di prueba.
