Aruba tin un Status Aparte unico den Reino Hulandes desde aña 1986. Aruba su Status Aparte ta diferente cu esun di Corsou y Sint Maarten y hustamente esaki ta pone cu nos mester para y defende e Status Aparte aki cu a duna nos e libertad y autonomia financiero cu a percura pa nos por a crece y desaroya nos mes economicamente.
Awe despues di 40 aña Status Aparte nos ta na un crusada peligroso caminda nos libertad y autonomia finaniero ta den peliger. E ta ancra den nos Statuut cu maneho financiero di pais Aruba ta algo ‘’AUTONOMO’’ di pais Aruba.
Un fiansa y debe di pandemia no por ta un motibo pa kita autonomia financiero di pais Aruba! Es mas, Aruba su situacion financiero despues di pandemia a mehora drasticamente. Minister Wever continuamente ta gaba cuanto placa Aruba tin y con bon e situacion financiero di pais Aruba ta. Aruba na e momentonan aki tin un surplus di 500 miyon florin, nos ta cumpliendo cu tur nos obligacionnan financiero, nos ta pagando nos debe externo sin problema, nos tin supervisionnan financiero di CAft y nos debe a baha di 120% pa 71% den apenas 4 aña.
Cu e ‘’factsnan” aki NO tin ningun motibo, ningun urgencia, ningun hustifacion y ningun motibo valido pa entrega nos Libertad, entrega nos autonomia, entrega nos derecho di autodeterminacion.
E Rijkswet HOFA cu su tata ta Mike Eman, su mama Gerlien Croes y padrastro Geoffrey Wever ta un traicion pa nos Status Aparte y libertad. Mike Eman, Gerlien Croes y Geoffrey Wever lo bay den historia como esnan cu a traiciona nos pais y entrega nos status autonomo.
Rijkswet HOFA lo kita derecho di Parlamento y Aruba lo perde su autonomia financiero
Esaki ta e consecuencianan di e Rijkswet HOFA pa nos libertad y autonomia financiero:
- E rijkswet HOFA ta duna Hulanda e autoridad pa dicidi con Aruba mag di gasta su propio placa. Desde cuando un banco, cu ta prestabo placa, por dicidi pabo con abo mag gasta bo propio entrada?
- E rijkswet HOFA ta duna Hulanda e autoridad pa dicidi cuanto placa Aruba mag di fia!
- E ta un ley cu ta bay hopi mas leu cu solamente controla.
- Pa cada inversion sea chikito of grandi mester pidi PERMISO na Conseho di Minister di Reino (gobierno di Hulanda). Desde aña 1986 pais Aruba ta dicidi riba tur inversión y cu HOFA esaki lo cambia!
Esaki ta puntonan cu nos mester informa communidad pakico nos ta considera e rjkswet HOFA como entrega di nos libertad y entrega di nos autonomia.
Nos ta lamenta cu den parlamento tin miembronan cu no ta sinti nada pa nos Libertad, nan no ta sinti nada di orguyo di por ta biba den un pais liber, nan no ta sinti nada pa nos Status Aparte. Ni con chikito un nacion ta, semper bo mester para firme y fuerte pa bo principionan y dignidad!
Libertad di un pais NO tin prijs y pa un sakito di placa bende nos alma y libertad NO ta aceptabel!
