Prome Minister Evelyn Wever-Croes recientemente tawatin un reunion interesante cu ehecutivonan di FIFA pa dialoga tocante e proyecto di turf (yerba artificial) pa 7 veld di futbol na Aruba.
Durante e reunion FIFA y AVB a duna di conoce cu 7 veld na Aruba lo haya turf, y e bon noticia ta cu tur gasto lo wordo cubri pa FIFA. E 7 veldanan cu inicialmente lo haya turf ta veld di Nacional, Bubali, RCA, River Plate, Dakota, Estrella y La Fama.
Presente pa e reunion tawata Minister di Deporte, señor Endy Croes, Artificial Turf expert di FIFA, señor Alastair Cox hunto cu FIFA Regional Development Manager, señor Jordan Victoire y representantenan di AVB (Arubaanse Voetbal Bond), consistendo di e Presidente señor Randolf Lacle, Secretario General, señora Dyane Wiersma y Project Manager, señor Pancho Croes.
Prome Minister ta indica cu Gobierno di Aruba na e momentonan aki ta dunando di su parti trahando riba e asuntonan legal di tereno y tur otro proceso necesario pa e proyecto por cana bon y FIFA por haci e inversion na e momento indica. E trabounan lo cuminsa na comienso di aña 2025 y inicialmente lo pone turf na 2 veld pareu y e trabou lo dura entre 3 pa 4 luna, y asina lo continua cu e demas veldnan. E proyecto aki sigur lo eleva e nivel di futbol y lo mehora e desaroyo di futbol en general na Aruba.
E meta y enfoke di FIFA cu proyectonan asina principalmente ta pa mira mas desaroyo den futbol di categoria di mucha, hoben y futbol femenino. Clubnan cu tin ekiponan den e categorianan aki lo bin mas lihe na remarke.
Prome Minister ta remarca cu e 7 veldnan cu na e momento aki a wordo scogi ta cumpli cu exigencianan di FIFA cu ta necesario pa bin na remarke pa e proyecto. E otro clubnan cu na e momento aki no ta cumpli cu e exigencianan di FIFA, lo haya e atencion necesario pa asina den futuro nan tambe lo bin na remarke pa e turf.
“Principalmente e meta di FIFA ta pa stimula clubnan di futbol pa traha riba e desaroyo di e deporte enfoca riba futbol di mucha, hoben y futbol femenino y esey ta algo cu mi ta aplaudi y apoya. Pabien na e 7 clubnan cu awor a wordo scogi. Mi sincero gradicimento na FIFA, na AVB pa e intermediacion y tur stakeholder cu a traha hunto riba e bunita proyecto aki. Danki di curason na Minister di Deporte, Endy Croes pa su bon trabou incansabel y su dedicacion pa nos por a logra esaki”, Prome Minister a expresa.
