Partido Movimiento Electoral di Pueblo (MEP) a tene diaranson anochi, su ultimo Ban Topa den e bario di Santa Cruz. E encuentro aki a tuma luga na Cede di MEP y a conta cu un sala completamente yen. Hopi ta e famianan, amistadnan, conocirnan y sostenedoranan di e candidatonan di Santa Cruz cu tabata presente. Riba e anochi aki, a introduci e dos candidatonan nobo pa e districto di Santa Cruz, cu ta den persona di Chito Geerman y Aldrin Lampe.
Despues di e introduccion di e candidato nobonan, a tuma palabra Setty Christiaans-Yarzagaray cu tambe ta un candidato riba lista di MEP cu ta representa Santa Cruz. Setty a cuminsa su presentacion splicando un poco di su trayectoria politica pa despues duna informacion importante riba stadisticanan di CBS, inflacion, prijs di productonan/ canasta basico y un topico cu ta hopi serca di su curason cu ta e problema di cacho riba caya. Na final di su presentacion, cu hopi emocion Setty a gradici tur su sostenedornan, specialmente su famianan, partido, y a termina cu palabranan di gradicimento hopi bunita dirigi na lider di partido Evelyn Wever-Croes.
E siguiente candidato cu a duna presentacion tabata Edgard Vrolijk, cu tambe ta un candidato di Santa Cruz. Edgard a cuminsa su presentacion splicando e gravedad di loke a pasa ultimo den sala parlamento y cu mester tin mas siguridad riba kico ta wordo treci durante e reunionnan den sala di parlamento. Despues el a sigui su presentacion compartiendo informacion importante y relevante riba e topico di enseñansa y riba e barionnan na Aruba.
Na final di e anochi, lider di partido Evelyn Wever-Croes a duna un discurso na unda el a splica den detayes kico tabata e situacion den Parlamento durante e ultimo reunion dia 5 di november. Por ultimo el a pasa riba e 7 puntonan di prioridad poniendo enfasis riba e puntonan cu no a wordo cubri pa e otro candidatonan.
E reunion di Ban Topa aki tabata e ultimo encuentro di Ban Topa cu partido MEP a organisa pa cu e temporada di eleccion 2024. Un reunion sumamente productivo cu a conta cu un sala completamente yen. Lider di partido y candidatonan riba lista di MEP ta gradici Aruba completo pa nan sosten y participacion na tur e encuentronan di Ban Topa cu a tuma luga den e temporada di 2 di Mei 2023 te cu diaranson anochi 6 di November 2024. Un danki di curason na tur cu haci e encuentronan aki posibel, paso ta solamente hunto nos lo yega na e victoria aplastante dia 6 di december proximo.
