Un controversia politico y huridico nobo a explota den comunidad despues cu e parlamentario y candidato pa minister di AVP, Mike de Meza, hunto cu su señora, a yega na un acuerdo cu Ministerio Publico (OM). De Meza a acepta y paga un transaccion di 2,500 florin pa asina e caso penal pa supuestamente entrega declaracionnan di impuesto (inkomstenbelasting) robes of incompleto keda clausura.
Sinembargo, e declaracion di De Meza unda e ta sostene cu e a keda “liber di culpa” y cu esaki ta duna’e e garantia di ta completamente limpi pa asumi un puesto di minister, a lanta un ola di cuestionamento critico. Pa hopi observador y experto huridico, e relato aki no ta cuadra cu e realidad di con ley penal y un transaccion ta funciona.
E Contradiccion: Transaccion y Culpabilidad ta cana hunto!
Den e mundo legal, un transaccion (afdoening / schikking) cu Ministerio Publico no ta un “sentencia di inocencia” dicta pa un hues. Un transaccion ta keda ofreci unicamente ora Ministerio Publico ta sostene cu e tin prueba suficiente pa hiba e sospechoso corte y persigue penalmente.
Pa e motivo ey, e argumento cu bo ta “liber di culpa” mientras bo ta saca placa for di bo saco pa paga un multa di acuerdo (schikking) ta duna un sensacion confuso y engañoso na e pueblo:
- Si bo ta inocente, pakico paga? Si un persona ta 100% convenci di su inocencia y cu e no a comete ningun falta fiscal, e ehemplo di un lider di pueblo ta pa bay dilanti un Hues den Corte di Prome Instancia y laga e Hues absolve di tur culpa abiertamente.
- Paga pa evita e riesgo di hues: Aceptando pa paga e 2,500 florin net prome cu e fecha di e caso den corte (cual tabata planea pa 24 di Augustus 2026), e sospechoso ta scoge consciente pa evita persecucion penal y evita e riesgo cu un Hues por condene’e oficialmente.
- Culpa y transaccion ta mara, nan ta casa: E hecho cu OM no a exigi un “admision di culpa explícito” den e documento di acuerdo, no ta nifica cu e persona a keda “declara inocente”. E pago mes ta e condicion y e atencion financiero pa e caso wordo cera. Paga y culpa, den e caso aki, ta cana man den man y no separa.
“Ora bo acepta di paga un transaccion pa no bay sinta dilanti un hues penal, bo ta cumprando paz procesal. Bise ‘liber di culpa’ ta purba tapa e solo cu un dede di pa pueblo.”
Duda cu ta keda den aire pa e pueblo
E acuerdo aki di ultimo momento entre De Meza y OM ta lanta varios pregunta cu e ciudadano comun ta haci su mes: E ehemplo pa e pueblo: Un ciudadano comun cu e haci un falta fiscal di miles di florin, tambe ta ricibi e oportunidad pa paga unicamente 2,500 florin pa keda liber di bay corte? Peticion di un suma mas abao: Segun e propio comunicadonan, e prome oferta di OM den e reunion di TOM (Transactiezitting) na Juni 2026 a keda rechasa pa De Meza. Despues, na Augustus 2026, a pidi un di dos reunion caminda OM a baha e suma pa 2,500 florin pa e acepta. Esaki ta demostra cu e decision di paga tabata pa habri e caminda politico y no pasobra e caso a keda desmenti debidamente den corte. Moralidad Politico: Aun cu huridicamente e caso penal a keda cera, e ehempel di integridad pa un futuro Minister di Finanzas o Infrastructura ta keda severamente cuestiona. E pueblo tin derecho di sa si esaki ta e standard nobo pa goberna nos pais.
Solo di Pueblo lo sigui e desaroyo aki di cerca, pasobra e pueblo di Aruba merece transparencia total y no hungamento cu palabra ora ta trata di nos ley y nos lidernan politico!
