Iglesianan Cristian di Aruba (ICA), cu ta representa un variedad amplio di Iglesianan riba nos isla, ta desea di expresa su punto di bista tocante bishita di un crucero cu tema di nudismo na Aruba proximamente.
Aruba ta conoci di ta un isla di hende caluroso, hospitalario y amabel. Turismo ta di sumo importancia pa nos economia y nos ta ricibi bishitantenan di rond di mundo cu amor y respet.
Di otro banda, famianan, muchanan, iglesianan y scolnan ta forma parti integral di Aruba tambe. Nos isla ta mantene balornan cultural y moral cu ta enfatisa decencia publico, dignidad y consideracion pa futuro generacionnan.
Nos preocupacion no ta escogencia priva cu ta haci abordo di e crucero. Nos preocupacion ta concerni conducta den luganan cu nos tur ta comparti, manera riba caya, na beach y den establecimentonan publico. Luganan publico ta pertenece na nos tur, incluso famia y hendenan menor di edad. Hustamente den luganan publico mester mantene un standard di respet cu ta proteha henter comunidad.
Scritura ta corda nos den Proverbianan 22:28 pa no kita marca di e frontera antiguo cu nos antepasadonan a pone. Cada nacion tin limitenan cultural y moral cu ta forma su identidad. Bishitantenan semper ta bonbini, pero mester reconoce y respeta e limitenan cu ta existi.
ICA, cu tur respet, ta haci un yamada riba:
· Esnan cu ta organisa bishitanan crucero pa comunica cu claridad na e pasaheronan prome cu yegada, leynan di Aruba y nos standardnan di decencia publico;
· Nos autoridadnan gubernamental pa defini cu claridad kico ta comportacion apropia den luganan publico ora e bishitantenan ta riba nos suela;
· Nos bishitantenan mes pa demostra sensibibilidad cultural y respet ora ta disfruta di nos isla.
Nos ta convenci cu respet mutuo ta posibel. Bishitantenan ta bonbini pa experiencia Aruba den su totalidad, con tal cu comportacion den publico ta cuadra cu standardnan cu ta tene cuenta cu famia y preserva harmonia social.
Aruba su punto fuerte semper tabata su habilidad pa mantene un balansa entre hospitabilidad y dignidad. Cu comunicacion cla y raspa, hunto cu liderasgo responsabel, nos por y nos mester mantene e balansa aki.
