Un decision crucial pa futuro di politica di Aruba ta riba mesa di Mike Eman i Parlamento. E asunto ta keda rond di e proposicion pa nombra De Meza como minister, mientras tin un conseho di integridad di parti di Impuesto cu ta sumamente negativo.
Eman tin pa yega cu un decision historico: si lo propone De Meza, of si lo pone integridad prome riba política. Bo ta bisa cu De Meza ta un bonhende, pero e informe di e inspector fiscal ta pone pregunta serio riba e comportacion financiero y civico di De Meza.
Segun e documento, De Meza a tin cientos di mil na debe, cu despues a caduca pa motibo di “verjaring” – un ley cu ta bisa cu despues di cierto aña, un debe no por wordo cobra legalmente. Pero e cuestion aki ta no tanto e existencia di debe, sino e falta di accion di De Meza durante e tempo ey. Segun e informe, el’a drumi manera un cayman bou di awa, warda keto keto, laga e belasting caduca, pa e core peticiona “verjaring”. Esaki no ta corecto.
Esaki, pa un persona cu kier tuma cargo publico, ta un mal ehempel di falta di responsabilidad i compromiso civico. Ademas, e mesun persona tin un patron repetitivo di no entrega su aangifte i no paga impuesto. Solamente awor, cu e kier bira minister, el’a core hasi e pago i entrega su documentonan.
E pregunta grandi ta: Lo Eman ignora e informe di Integridad y propone De Meza como minister?
Esaki ta momento di un test no solamente pa Eman, pero tambe pa Parlamento, pa partido FUTURO, y pa su lidernan Geofry i Gerlien.
Esaki ta un momento di refleho: lo nos eligi integridad i confianza di pueblo, of lo nos laga politica i interes personal tuma timon?
Finalmente, kiko lo ta e postura di Gobernador? Lo e pone un paro (stop) si e proceso no sigui regla di integridad?
Pueblo ta wak, ta spera i ta exigi un Aruba cu ta wordo guia riba base di transparensia i responsabilidad.
