Dia 5 di december 2022 nos a entrega nos declaracion titula “Declaracion di Pueblo Indigena Arubano” na VNO. Den nos declaracion nos ta basa nos mes riba tratadonan internacional relaciona cu derechonan di pueblonan indigena. Un di e tratadonan aki ta: United Nations Declaration on the Rights of Indigenous Peoples. Pueblo autoctono Arubano ta di rasa indjan Caquetio. E colonistanan mayoria di origen Hulandes cu a yega akinan den siglo 18 den transcurso di añanan a mescla cu e miembronan di e pueblo Caquetio existente akinan. Resultado di e prome censo realisa na 1715 a indica cu tabata biba 393 indjan Caquetio na Aruba. Na 1754 gobernante y colonistanan a haya permiso di WIC pa habita Aruba. Nos ta descendiente di e Caquetionan y e prome Hulandesnan cu a yega e tempo ey.
Nos historia sociocultural t’e punto di salida p’e declaracion di Movemento Indigena Arubano. Hulandesnan di WIC a colonisa Aruba sin consentimento di e habitantenan Caquetio cu tabata biba trankil den tur libertad. Nan a wordo obliga pa traha sin pago; coba pos, traha trankera, limpia rooinan y core trei cabrito. Den 1795 Indjannan a lanta contra tanto abuso y a nenga di sigui traha p’e Hulandesnan. Rebelion indigena a sigui tuma luga te na 1827 ainda. Y Iglesia catolico a hunga un rol importante den e represion di pueblo indigena Arubano. A tene e pueblo abou a base di religion y a spanta pueblo cu dios y fierno. Na aña 1824 a descubri oro y atrobe pueblo no a haya ningun beneficio. Tur cos a wordo dirigi p’e Hulandesnan cu hasta a otorga conces na companianan stranhero. Pueblo indigena mes no tabata mag di coba ora. Hulandesnan tabata impone castigo di zweep si nan gara un nativo ta coba oro. Hopi di nos a yega di tende storianan di nos grandinan tocante benanan scondi den mondi. P’esey un di nos exigencianan den nos declaracion ta debolbe nos e balor actual di e oro cu a wordo saca te na 1916 foi Aruba su suelo. Sin importa cu ta Hulanda of ta companianan stranhero a bay cu nos oro. Paso tur cos a tuma luga sin consentimento di e pueblo original. Pueblo indigena mes no tabatin mucho di bisa. Hulanda a uza e mesun base canonico cu a wordo uza den tur colonia;
Doctrina di Descubrimento. Esaki ta basa riba leynan canonico Papal di 1493 cu ta bisa cu tur pais cu wordo descubri unda hende no ta profesa e fe catolico, no tin alma y por wordo subyuga y colonisa. Asina colonisadornan a crea un pueblo sumiso y a kibra spirito guerero di e pueblo indigena Arubano . Na 2022 ainda e spirito pasivo di conformidad ta biba fuertemente den nos pueblo indigena.
Nos di movemento Indigena Arubano a pone 15 exigencia dirigi na Estado Hulandes. Exigencianan ta entre otro: stop di duna paspoort via Aruba; stop permiso di estadia y trabou; 5000 euro pa luna pa cada miembro di tribu indigena Arubano; derecho riba tur tereno publico cu no ta duna ainda den erfpacht; pago na nos tribu di 1,180 ton di oro na e balor actual; awa, coriente, telefoon y internet gratis pa tur miembro di tribu Caquetio Arubano; 100 mil euro pa cada studiante miembro di tribu; paspoort Caquetio Arubano manteniendo nos paspoort Hulandes; parti di e beneficionan anual di tur negoshi y hotel situa riba tera Caquetio Arubano; moratorio inmediato pa hotel, condominio, airbnb y supermercado Chines; entrada gratis pa Parke Arikok. Y ainda falta mas exigencia.
Pregunta crucial: ken ta pertenece na nos tribu? Cua t’e criterionan cu mester cumpli cu nan?
Criterio pa bira miembro: cada persona cu kier bira miembro di tribu Caquetio Arubano mester prueba, a base di stamboom di ANA, cu e tin un stammoeder y/of un stamvader naci na Aruba den siglo 18 y/of siglo 19. Finalmente nos ta desea Aruba Indigena un bon aña 2023 cu su spirito Caquetio Arubano lanta.
Movemento Indigena Arubano/Aruban Warriors
