Minister Gerlien Croes a purba defende su mes e siman aki den Parlamento. Laga nos analisa su defensa.
Ta un biahe priva, mescos cu si e bay Subway y Parlamento no tin nada di cuestiona
E minister a declara cu el a paga e biahe cu avion priva for di su propio placa, y cu pa e motibo ey no tin obligacion di duna mas explicacion ni prueba. E pensamento ey ta fout! Den nos sistema parlamentario, responsabilidad ministerial no ta depende di ken a paga. Loke ta esencial ta cu aki nos ta papia di un biahe oficial den funcion, cu el’a realisa hunto cu su consehero, realisa cu un medio di transporte special y hopi caro: un jet priva. Bo no por compare cu bay supermercado, manera e minister kier pa Parlamento kere. Esaki ta crea automaticamente pregunta riba integridad, independencia y transparencia. Un simple declaracion cu “mi mes a paga” por lo tanto no ta suficiente.
E ta insisti cu el’a paga pa e biahe, “algun cien florin” pa comparti gasto di e avion
Sin claridad riba na ken a paga, cuanto a paga y ki dia a paga, Parlamento no por sin mas acepta e declaracion ey. Ademas, sin claridad, e ta stroba Parlamento di evalua si e pago a wordo haci conforme balor di mercado, of si tin indicacion di un regalo of beneficio. Pasobra e codigo di conducta ministerial ta duna un interpretacion amplio na e palabra “regalo”, un regalo ta tambe ora bo paga 100 florin pa algo cu bal 1000 florin. Den e caso ey e diferencia, 900 florin ta wordo considera como regalo. Esey nan ta principionan huridico basico. Si locual cu el’a bisa ta berdad, algo cu ainda e mes no por a prueba, cu el’a paga algun cien florin, pa algo cu bal algun mil florin, e ora e mester a meld e beneficio, e regalo cu el’a haya, esta e diferencia entre locual cu el’a paga, y locual e balor di e biahe ta. Un persona cu awe book un vuelo den jet priva pa Corsou, ta paga rond di 4000 florin. Si e minister a paga “algun cien florin”, definitivamente tin un beneficio, un regalo.
Mester raporta e beneficio, e regalo
Segun e Codigo di Conducta di Minister, e mester meld e regalo y meld di ken el’a haya e regalo, serca Prome Minister. Pakico? Pa asina por controla si mayan e ta paga e “fabor” aki bek cu permiso of otro forma. Prome Minister Mike Eman a declara den Parlamento cu e no a ricibi ningun melding di Minister Gerlien Croes. Pues aki e Minister Gerlien Croes ta violando e Codigo di Conducta di Ministernan. Ademas, e Codigo di Conducta aki ta stipula cu un minister no mag di ricibi un regalo cu bal mas di 250 florin, y den e caso aki, minister Gerlien Croes su beneficio ta mas halto cu 250 florin.
Basa riba tur esaki mester conclui cu Minister Gerlien Croes su defensa ta full fout. Fraccion di MEP lo sigui cu e investigacion parlamentario, y lo bay suminstra tanto Bureau Integriteit Aruba (BIA) como Ministerio Publico (OM) mas informacion pa nan tambe por sigui cu nan investigacionnan independiente.
