Den marco di e bishita oficial di delegacion di AVP na Hulanda, nan a haya un presentacion importante for di Fondo Internacional Infantil di Nacionnan Uni (UNICEF) referente na e colaboracion cu a cuminsa na aña 2013 entre Aruba y UNICEF Nederland. For di e tempo ey, UNICEF a sigui traha estrechamente cu tur gobierno y stakeholder pa promove bienestar y proteccion di nos muchanan.
Un momento crucial den e relacion aki a tuma lugar den aña 2022, ora cu gobierno di Aruba y UNICEF a haya un donacion di 1 miyon florin di Postcode Loterij. E fondo aki a permiti e implementacion di programa pa yuda sostene e proceso di recuperacion despues di pandemia di COVID-19. Esaki ta proyectonan cu a duna beneficio directo y tangibel na nos comunidad.
Awor cu tur fondo pa e proyectonan original a termina, ta keda na Gobierno di Aruba pa aloca recurso pa garantisa continuacion di e iniciativanan den tapara cu lo duna resultado positivo.
Segun UNICEF, Aruba a logra bon progreso cu direccion y trekkernan asigna na e temanan, no tin ningun impedimento pa sigui implementa e proyectonan bou di otro schema di maneho.
Na aña 2025, UNICEF ta sigui presente na nos isla cu algun proyecto vital, incluyendo e apertura y implementacion di un modelo “family friendly workplace”. E ultimo ta un paso crucial pa yuda famia y trahadonan, crea un ambiente laboral cu ta adapta na necesidad di cuidadonan di mucha. Esaki ta un desaroyo cu tin beneficionan profundo y cu por fortalece tanto e bida familiar, como e mercado laboral.
E bishita na UNICEF ta refleha un continuidad den e relacion cu delegacionnan di Aruba semper a mantene durante añanan. E contacto permanente ta esencial pa sigura cu Aruba ta keda al tanto di tur desaroyonan nobo y cu e colaboracion cu UNICEF por sigui duna resultado real na bienestar di nos pueblo.
Delegacion di AVP ta reafirma su compromiso pa sigui traha na nivel internacional y nacional pa promove un futuro den cual e bienestar di nos mucha y famianan ta enfoke central di e politica cu ta hiba.
