Na St. Lucas Kerk na Tilburg a tuma lugar un misa pa tuma despedida di Filomena (Mena) Maduro. Pa hopi aña Mena a fungi como presidente di Asociacion Nos Baranca cu entre otro tur aña tabata organisa e Festival di San Juan/Dera Gai.
Hopi hende a presencia e ceremonia special aki y entre nan, Minister Plenipotenciario mr. Ady Thijsen, directora di Gabinete di Aruba Joselin Croes LL.M. Msc. Nuris Dabian, mr. Shandra John, Ivonne Navas y Sidney Kock.
Mirando e relacion estrecho cu Mena como presidente di Nos Baranca tabata tin cu Gabinete di Aruba, tabata tin e oportunidad pa Minister Thijsen a hiba palabra. Sr. Thijsen den su discurso a referi na e historia di Nos Baranca cu a wordo lanta riba 3 di December 1989. Mena den e prome periodo tabata voluntatio pa Nos Baranca, cu tabata tin como meta pa proteccion di interes y duna sosten na e comunidad Arubiano na Tilburg y vecindario. ‘Despues di a drenta den e directiva di Nos Baranca, Mena na 1993 a bira presidente di Nos Baranca. Mena pa mas cu trinta aña a bringa na interes di Arubianonan y tambe a haci posibel cu e Arubiano por a celebra su cultura den forma di actividadnan, manera e Festival di San Juan/Dera Gai. Tambe ela organisa otro actividadnan social y educativo. Mena semper tabata para cla pa yuda hende. Mena tabata scerpi, energico, responsabel y servicial. Mena tabata tin un curazon grandi. Na momento cu no tabata tin suficiente financiamento pa organisa San Juan, Mena ta pone su mesun placa pa asina sigura cu e Festival toch por sigi. Y den esaki semper e por a conta cu e sosten di su esposo y su yuinan,’ segun Minister Thijsen.
E mandatario a sigi bisa cu Mena tabata tin contacto cu diferente organisacionnan, cu municipio di Tilburg y sigur cu Gabinete di Aruba. Mena pa hopi hende tabata fungi como advisor. Minister Thiijsen: ‘Hopi di nos aki na Hulanda, pero principalmente na Tilburg y specialmente studiantenan a conoce Mena di cerca. Hopi di nan a regresa Aruba y ta ocupa puestonan halto na Aruba. Di otro banda Mena a sabi di intrega su mes den e comunidad Hulandes. Ela traha na diferente instancianan na Tilburg y tabata “beheerder” na diferente centronan di bario na Tilburg. Asina ela cera conoci cu hopi hende. Un cos Mena a siña nos, pa ta orguyoso di nos cultura Arubiano y banda di esaki pa nos tambe bira parti di e comunidad Hulandes. Mena tabata un persona ehemplar cu nunca nos por lubida,’ tabata palabranan di Minister Plenipotenciario di Aruba Ady Thijsen durante di misa pa tuma despedida di Mena Maduro.
Asina a rindi honor na Mena Maduro, un persona hopi keri den Tilburg y den e comunidad Arubiano na Hulanda. Tambe como un persona cu semper a carga e cultura di Aruba na laira y a haci hopi pa stimula y conserva esaki bou di e comunidad Arubiano na Huanda.
