Den cuadro di e bishita di Gobierno di Aruba na Hulanda, prome minister mr. Mike Eman, hunto cu vice-prome minister mr. Gerlien Croes, minister mr. Geoffrey Wever y minister plenipotenciario Mildred Schwengle, a reuni na Ministerio di Asuntonan Economico di Hulanda na Den Haag cu un grupo di funcionario Hulandes di e Tijdelijke Werkorganisatie (TWO) como tambe di e mesun Ministerio di Asuntonan Economico pa dialoga riba futuro di e area di e ex-refineria na Aruba.
Durante e reunion, a enfoca riba cooperacion tecnico, apoyo strategico y e posibilidadnan concreto pa desaroyo di un destino nobo p’e area di ex-refineria, como parti di e vision di Gabinete AVP-Futuro pa diversificacion economico y desaroyo sostenibel di Aruba. Segun Prome Minister Eman, e reunion a representa un paso importante den e proceso di planificacion strategico pa futuro di Aruba mirando cu e area di e ex-refineria como un zona cu tin hopi potencial pa futuro di nos economia, a pesar di e retonan cu e area ta enfrenta.
“Ta un area cu tin hopi perspectiva. Tin reto grandi manera limpiesa y rehabilitacion, pero e area tin tambe enorme potencial pa Aruba,” Prome Minister Mike Eman a splica. Durante e sesion di brainstorming, diferente experto y tecnico di Rijksvastgoedbedrijf, Ministerio di Asuntonan Economico y Ministerio di Interior y Relacionnan di Reino a comparti nan experiencia y conocemento cu por contribui na e proceso di desaroyo di e area aki. Prome Minister Eman a enfatisa cu Aruba ta busca combina e experiencia Hulandes cu e conocemento local di diferente ministerio, stakeholder y instancia manera Refineria di Aruba N.V. (RdA) pa crea un vision realista y prometedor p’e area aki. “Nos ta mira un oportunidad grandi pa combina e experiencia amplio di gobierno Hulandes cu e experiencia y conocemento local di Aruba,” Prome Minister a expresa. Segun e delegacion di Aruba, e reunion a resulta den compromiso concreto pa sigui cu e proceso den e siguiente simannan.
“Nos a yega na compromiso cu dentro di dos siman lo presenta algun idea concreto di e direccion pa sigui y p’e expertonan aki por bishita Aruba y reuni cu nos stakeholdernan local,” Prome Minister Eman a declara. Gabinete AVP-Futuro ta considera e proyecto aki como un proyecto di importancia strategico pa futuro economico di Aruba y pa crea varios portunidad nobo di inversion y desaroyo. “E decisionnan cu nos ta tuma awor lo ta sumamente importante pa futuro di Aruba,” Prome Minister Mike Eman a conclui.
Tocante Tijdelijke Werkorganisatie (TWO)
TWO t’e structura temporario di Ministerio di Interior y Relacionnan di Reino cu ta ofrece apoyo na Aruba, Corsou y Sint Maarten den ehecucion di reforma acorda den e landspakketten. E TWO ta traha hunto cu diferente ministerio Hulandes cu ta aporta conocemento tecnico y experticio. Hunto cu cada pais, TWO ta prepara un agenda di ehecucion pa traduci e landspakketten den proyecto, programa y reforma concreto. E agenda aki ta actualisa periodicamente y TWO hunto cu e paisnan ta presenta raportahe tocante progreso di e ehecucion.
Gobierno di Aruba ta mira e cooperacion cu Hulanda y e apoyo di TWO como un paso importante den e buskeda pa un economia mas diversifica, sostenibel y resistente pa futuro.
