ORANJESTAD – Awe mainta a sigui cu tratamento di caso Avestruz, caminda Fiscal a baha pisa.  E sospechosonan: Biemans, Harms, Every, Nuñez, Werleman, Mansur, Susebeek, Abath, Richardson tabata presente den sala di Corte pa scucha e exigencia di Fiscal. Arends y Winterdaal no tabata presente.ARUBANATIVE por a compronde cu pa algun di e sospechosonan, Fiscal a exigi castigo di prison. Pa otronan castigo di prison y multa y hasta tabatin un sospechoso cu Fiscal a pidi pa declara liber.

SEVINGER A LAGA AMIGONAN BIRA MAS RICO

   Fiscal a bisa cu e caso Avestruz ta mustra cu un minister, Sevinger, a laga su amigonan bira mas rico. A duna previlegio na algun cu a gana miyones. Esaki no ta algo cu sosode solamente na Aruba sino henter Antiyas Hulandes. Tin sentencianan di casonan cu a sosode na otro paisnan den Antiyas Hulandes.

NO TIN PERSECUSION POLITICO

   Fiscal a bisa Hues cu e persecusion contra e personanan aki ta solamente pasobra nan a haci algo contra ley. No tin nada di persecision politico. El a bisa cu Ministerio Publico y Landsrecherche a haci nan investigacion intachabel.

GRUPO PREVILEGIA PA HAYA TERENO

El a bisa cu e sistema di erfpacht na Aruba ta hopi tranca. Por dura añas promer cu un hende por haya reaccion pa un tereno. Via DIP mester haci peticion. Sinembargo un grupo chikito ta haya loke nan kier via Sevinger. Sevinger tabata firma e peticionnan y manda pa DIP. Ta hopi miyones di florin e grupito a gana sin haci mucho gasto.

PONE BESLAG RIBA 2.4 MIYON FLORIN DI SUSEBEEK

   Fiscal a mustra cu Susebeek a haya erfpacht y algun dia despues a bende esaki pa 1.4 Miyon Dollar y pone esaki riba un cuenta bancario den exterior. A pone beslag riba esaki.

GRUPITO A GANA HOPI PLACA

   Fiscal a mustra cu Mansur di e proyecto Lisner a haya 1.3 miyon dollar. Werleman casi 1 myon dollar y Nuñez 800 mil dollar di e proyecto Damira. Lisner y Damira a wordo cumpra door di e grupo Donadi pa 3.5 miyon dollar. Arends cu e proyectonan Doushant y Elenath a haya 750 mil florin. E sospechosonan aki ta laga mustra cu lo bay haci un proyecto y ta haya erfpacht y despues ta bende esaki pa hopi placa. Fiscal a bisa cu Harms y Biemans realmente a realisa nan proyecto. Pero otronan no. Landsrecherche a logra descubri esaki. Abath y Every a yuda Sevinger. Sevinger a malversa 11 mil florin di Fundacion Curazon Berde pa paga pasashi pa su señora viaha hunto cu Sevinger.

BIEMANS LIBER DI TUR ACUSACION

Fiscal a bisa Hues cu e ta pidi pa declara Biemas liber di tur acusacion. E ta haya cu Biemans doño di Bucuti a pidi expansion di erfpacht pa traha un cushina nobo. No tin nada irregular a sosode aki. Por a mira Biemans a bisa sumamente contento.

CASTIGONAN EXIGI

Despues di a exigi 5 aña di prison y 10 aña sin por postula como politico contra Benny Sevinger, Fiscal a sigui cu Susebeek. Fiscal ta haya cu Susebeek tabata scondi tras di diferente compania, mientras cu e tabata dicidi tur cos. E ta haya cu Susebeek a cumpra Sevinger y a laba placa. Fiscal a exigi 4 aña di prison, kitando e 34 dianan cu e tabata sera y cu e 2.4 miyon florin lo keda confisca.

   Despues Hues a sigui cu Arends. E ta haya cu Arends tabata e cabez tras di e dos proyectonan y a gana 750 mil florin. Fiscal a exigi 3 aña di prison, kitando e 46 dianan cu e tabata sera. Ademas Fiscal a exigi un boet di 25 mil florin.

   Fiscal ta haya Nuñez, Werleman y Mansur culpabel. El a mustra cu durante investigacion di caso Avestruz, Mansur a bula bay Merca pasobra e no tabata kier bay sera. Fiscal a exigi 2 aña di prison pa cada un y 25 mil florin di boet pa cada un.

   Fiscal a pidi Hues pa declara Abath liber di e acusacion di a wordo cumpra pa Biemans. Pa e otro casonan di pasamento di tereno e ta haya cu Abath a yuda Sevinger. El a exigi 6 luna di prison, kitando e tempo cu e tabata sera.

   Fiscal a pidi pa declara Winterdaal culpabel pero no ta duna castigo.

   Fiscal a exigi pa Richardson, castigo igual na loke e tabata sera y 2 luna di prison condicional y 2 aña di prueba.

   Fiscal a exigi pa Every, castigo igual na e18 dianan cu e tabata sera. Tambe a exigi 160 ora di trabao pa comunidad.

Otro luna 12,13,14,15 y 16 December, abogadonan tin oportunidad di presenta nan defensa y Fiscal tin oportunidad di reacciona. Despues e abogadonan por bolbe reacciona y tur sospechoso tin chens pa expresa nan mes. Despues Hues lo sera tratamento di e caso y lo fiha un fecha pa sentencia cual lo bay ta otro aña.

LEAVE A REPLY

Please enter your comment!
Please enter your name here