Esey tur hende mester sa , cu den Cristo Hesus tin poder pa restaura bida, pasobra Cristo Hesus ta duna bida,
E ta pordona,
E ta restaura,
E ta libera,
E no ta condena,
E ta salba, y pa medio di dj’E nos tin bida eterna.
Nos no tin mester di keda pega den tempo, den pica, inmoralidad, abominacion, crminalidad, adiccion etc, pero nos por ta liber den Cristo Hesus, liber for di gara di satanas, y liber for di scuridad y di e sistema di mundo ( Romanonan 12:2).
Tin hopi hende ta opta pa nan mes di ta mara den inmoralidad, pero nan sa masha bon cu esey no ta bon ni spiritual, ni fisico, ni social, y tin biaha hasta ni familiar, pasobra e famia no kier sostene e pica, sabiendo cu den e cosnan ey boluntad di Dios no ta wordo respeta.
Ta bon pa tur hende sa cu e palabra di Dios ta bisa den 1 Juan 1 :9 cu si nos confesa nos picanan, E ta fiel y husto di pordona nos nos picanan, y libra nos di tur inhusticia.
Arepenti, Confesa y Aparta for di pica pa asina acepta Cristo como Senjor y Salbador ta tres paso cu tur hende mester tuma den nan bida pa asina nan tin un relacion solido cu Cristo Hesus, pasobra e palabra di Dios ta bisa cu esun cu kere den Cristo lo ta salba,y esun cu no kere ta condena caba, pasobra e no a kere den e Yiu unigenito di Dios.
Pakico gamble cu nos bida, pasobra mayan no ta priminti na ningun hende, pakico laga pa mayan locual nos por haci awe, pakico duna diabel oportunidad, di abusa di nos bida, nos cas, nos matrimonio, nos famia y nos salud, y hasta nos salud mental siendo cu den Cristo Hesus tin Poder restaura tur cos.( 2 Corintionan 5:17).
Cristo Hesus a lanta Lazaro for di morto, E a pone lam cana, ciego mira, sordo tende, cura leproso, lanta paralitico, saca demonjo,mudo papia,pasobra tur aurtoridad a wordo entrega na Cristo Hesus tanto na tera como den cielo.
Palabra di Dios ta bisa: Cu pa e nomber di Hesus tur rudia mester dobla, di esnan cu ta den cielo,y riba tera y bao di tera, y cu tur lenga mester confesa cu Hesus Cristo ta Senjor, pa e gloria di Dios Tata.( Filipensenan 2:10-11).
1 Pedro 5:10 ta para scirbi: Y despues cu boso a sufri pa un poco tempo, e Dios di tur gracia, Kende a yama boso pa su gloria eterno den Cristo, E mes lo perfeciona, confirma,fortalese,y stablece boso. Na dj’E sea e gloria y e dominio pa semper y semper . Amen.
Despues cu Dios a permiti e enemigo purba Job den tur forma, cu perdida material, perdida di famia, y gran perdida financiero, y hasta malesa, Dios a restaura tur cos bek den bida di Job . ( Job 42:10-12).
Despues cu David a comete pica, den adulterio y den crimen, etc , e a reconoce su pica, ricibi pordon y wordo restaura. (Salmo 51:12).
Ora e nuher adultera a wordo descubri y segun ley mester a wordo mata cu piedra e a reconoce su pica, y ricibi pordon di serca Cristo Hesus pa e bay y di awor padilanti no peca mas. ( Juan 8:1-11).
Pedro a ninga Cristo Hesus, pero den Juan capitulo 21 Cristo Hesus ta restaura Pedro su bida bek , pa e por ta util den servicio di Dios.
Si abo tin mester di restauracion pidi Senjor,
Sinceramente, Pastor Marcel Balootje
