Ariba 20 di november na aña 1999 tawata e prome biaha cu un mucha aki na Aruba a tuma un telefon, marca e number 131 y a ricibi informacion, sosten emocional y/ of conseho di 131. Ariba dia 20 di november, cu ta tambe dia Internacional di derecho di mucha, 131 ta celebra 27 aña di existencia. 

Den cuadro di dia Internacional di derecho di mucha y celebrando 27 aña di existencia di 131 Aruba, 131 Aruba conhuntamente cu Hungateca y IBISA a organisa Play and Learn na St. Franciscus college ariba diamars 17 di november. 

Derecho di mucha ta sumamente importante pa e desaroyo di nos muchanan aki na Aruba y otro parti di mundo. Cu conocemento tocante di derecho di mucha, e mucha ta siña cu e tin derecho, y cu otronan tambe tin derecho. Tambe e ta siña cu su derechonan ta caba caminda esun di otronan ta cuminsa. E tratado tocante derecho di mucha ta inlcui 42 articulo cu tey pa sostene famianan de buskeda di desaroyo di nan yiu.   

E articulonan cu a ser trata cu e muchanan durante Play and Learn ta articulo 17 (Tur mucha tin drecho ta haya informacion c uta importante pe.), articulo 24 (Mucha tin derecho ariba un mihor cuido di salud cu ta posibel), articulo 27 (Mucha tin derecho pa tin cuminda y bebida suficiente, paña y lugar safe pa biba y tin e necesidadnan fisico y mental basico pa nan por desaroya bon), articulo 29 (Tur mucha mester por desaroya nan talento, habilidad, y personalidad na scol, sea ta den pinta, idioma, deporte of arte.) y articulo 31 (Tur mucha tin derecho pa hunga, descansa y tin tempo liber). 

E alumnonan di St. Franciscus college a siña tocante nan derechonan door di pintamento, hungamento, deporte y dialoga tocante short films cu mensahe tocante nan derechonan. E muchanan a ricibi un treat di bacoba Tropic Alé for di Compra Aruba cu ta mira e importancia den salud di nos muchanan. 

Partnernan strategico cu a sostene e proyecto aki ta St. Fransiscus college, Hunga teca y IBISA.

Tambe nos kier a gradici nos otro partnernan cu ta tuma nan impacto social hopi serio y ta inverti den e muchanan y hobenan di Aruba y 131 Aruba.  Un gradicimento ta bay na Setar N.V., Aruba Airport Authority N.V., WEB Aruba N.V., The Salamander Group, Aruba Hotel and Tourism Association, Telearuba, Green Corridor, Watty Vos BLVD, ASTEC N.V., N.V. ELMAR, Compra Aruba y Fuels Marketing & Supply Aruba N.V. cu ta haci e trabao di 131 Aruba posibel. 

Pa mas informacion tocante Play and Learn por tuma contacto via nos website: 131.aw, Instagram: Instagram: 131aruba, facebook: https://www.facebook.com/aruba.131, email: 131aruba@gmail.com of telefon 5886138/ 5884011.