Ta separa e cobransa riba impuesto di entrada
Minister Xiomara Maduro a anuncia e ‘Plan di Impuesto 2023’ pa un sistema simpel y husto cu ta necesario pa recuperacion di Pais Aruba su finansa publico. E ‘Plan di Impuesto 2023’ ta conta cu un Pakete di Compensacion individual den cual ta tene cuenta cu e grupo di Pensionadonan di SVb.
Ta hisa suma liber di impuesto
Den e ‘Plan di Impuesto 2023’ lo hisa e suma di impuesto liber (‘belastingvrije voet’) di 28.861 florin pa 30.000 florin. Esaki ta baha e peso fiscal pa tur persona, specialmente pa e grupo di pensionado.
Ta separa cobransa di impuesto riba entrada di pensioen di behes di SVb
Un parti importante di e Pakete di Compensacion Individual ta cu lo separa e cobransa di impuesto di pensioen di SVb. Actualmente cerca un pareha casa cu tin pensioen di SVb, si por ehempel e hende homber ta gana mas cu e hende muhe, e pensioen di e hende muhe ta wordo conta riba e hende homber su entrada. Despues di deduci e suma liber di impuesto, e hende homber ta paga impuesto riba e suma acumula. Cu e cambio den e Pakete di Compensacion Individual ta separa e cobransa riba entrada di pensioen di behes di SVb. Por ehempel si e hende homber tabata paga un suma di 3.365 florin na impuesto di entrada, cu e cambio aki awor e hende homber aki ta paga 1.646 florin. E señora cu un pensioen di behes di SVb di 10.455 florin pa aña lo no paga impuesto ya cu e ta cay bou di e suma di liber di impuesto. E pareha aki lo paga un suma di 1.720 florin na impuesto.
Ta baha e peso fiscal pa e pensionado
Minister di Finansa ta subraya cu a duna oido na peticion di e pensionadonan y a inclui e punto aki den e Pakete di Compensacion Individual di e ‘Plan di Impuesto 2023.’ Entrante 1 di januari 2023, no ta acumula e suma di entrada cu ta pone cu e pareha ta paga menos na impuesto. E separacion di cobransa di impuesto riba entrada di SVb lo baha e peso fiscal pa e pensionado.
