Tin algo cu basta dia a sali for di man, y cu ta alarmante den nos sociedad, y cu nos a laga tempo y moda domina nos, pasobra tur locual nos mira hende ta haci, nos kier haci, pero esnan cu tin temor di Dios, y cu no ta bay tras di locual e mundo ta haci a scapa di esaki.
Si un homber ta bebe burachi tur dia of ocasionalmente , e ta keda un berguensa pa su famia, ora e ta maneha bao di influencia y polis ta kita rijbewijs for di dje, of e ta bay sera full un weekend pa motibo di buracheria, of mas peor e ta causa accidente cu consecuencia ferfelo pa su prohimo, y tambe e ta ranca palo di lus y hinca su curpa den un debe.Tur e cosnan ey ta trece disgusto den famia.
Ora un mucha ta rebelde y cu un actitud degenera, cu palabra malo, cu bringamento, cu canamento cu arma, polis ta buske cada rato, pa e nomber di bandido cu e ta carga, E kier haci bendemento di droga su ofishi, sabiendo cu e ta completamente ilegal toch e kier purba su suerte cu maldad y inmoralidad. Cada rato e ta cay sera pa su malcomportamento, esey tambe ta un dolor pa famia.
Nos yuinan ta nos rikesa ta nos herencia, ora hende mira nan , e hende ta mira nos, nan ta nos representante, pasobra nan ta fruta di nos matrimonio, y nos kier wordo reconoce como un mata cu ta duna bon fruta. Pasobra den esey nos ta demostra nos cu nos relacion cu Dios ta bon.( Juan 15:5).
Nos esposa/esposo semper mester duna un bon ehempel, pa asina demostra fieldad den tur cos, y pasobra esey ta locual Dios ta exigi di tur matrimonio, pasobra locual Dios a uni no laga ningun hende separa. Semper netji y na ordo y cu un bon conducta, cual ta ehempel y testimonio,pa e famia.
Pero awor tur hende por nota caminda e enemigo a drenta y ta ciega hende, pasobra nan ta bay mas tras di moda, y perversidad, perdiendo berguensa y cuminsa bisti di un forma cu no ta digno pa representa famia y matrimonio.
Un muher casa, ta pertenece na un solo homber, y e muher aki no tin nada di demostra di su curpa na otro hende, por ehempel e tipo di bisti cu tin awor aki caminda un hende muher ta cana cu casi tur dos su pechonan afo y asina demostra su mes curpa na otro hende, pasobra pecho ta keda un parti intimo di su curpa , pasobra ora hende casa nan ta un solo carni den tur cos.( Genesis 2:24-25).
Ta con nos por acepta cu un hende ta bay traha cu tipo di panja cu henter dia nan pechonan ta keda demostra den cara di nan colega, manera un inivtacion sin respet, of manera un hende cu a perde e direccion di decencia. Shimis y saya cortico den cual si algo cay for di dje e no por buk,of tipo di carson cu ta demostra tur cos na su curpa. Tur e cosnan aki ta cay bao di ramo di perversidad. Esaki ta conta igualmente pa nos yuinan ora nan ta sali riba caya.
No sea conforme e mundo aki, ma sea transforma, pa medio di renobacion di boso mente , y pa boso por comproba kico ta e bon y agradabel y perfecto boluntad di Dios.(Romanonan 12:2).
No lubida cu nos curpa ta tempel di Dios y e Spirito di Dios ta biba den dje.
Sinceramente, Pastor Marcel Balootje
