Prome Minister Evelyn Wever-Croes:
Den nomber di Gobierno di Aruba, Prome Minister Evelyn Wever-Croes ta felicita señor Errol de Freitas kende lo fungi como e siguiente Presidente di San Nicolas Business Association (SNBA) y ta gradici e Presidente saliente señor Andy Hernandez pa tur e bon trabou cu el a eherce den e asosacion y especialmente pa San Nicolas den e 4 termino cu el a fungi como Presidente di SNBA.
Recientemente durante reunion general di directiva di SNBA, a eligi señor Errol de Freitas como Presidente nobo pa e periodo 2022-2024. Pa Gobierno di Aruba, desaroyo den San Nicolas ta keda un prioridad y a mustra esaki cu accion durante Gabinete Wever-Croes I y II. Den esaki semper SNBA tawata un sosten pa e vision di Gobierno pa crecemento economico di San Nicolas. SNBA den su 50 aña di existencia a hunga un rol hopi importante y necesario pa e desaroyo na San Nicolas pero sigur tambe pa henter nos pais.
Pabien señor de Freitas y exito den bo funcion nobo como Presidente di SNBA.
