Autoridad Spanjo y Portugues a logra intercepta e cargamento di mas grandi di cocaina di e ultimo 15 añanan den oceano Atlantico
Yate abordo 5200 kilo di cocaina
Durante un investigacion, recientemente un yate di 24 meter largo a wordo rista den awanan internacional den oceano Atlantico. Abordo autoridad a bin topa cu un cargamento enorme di cocaina, tabata trata di total 183 bala di cocaina, cu tabata pisa mas o menos 5200 kilo.
Autoridad Spaño a intercepta e cargamento di mas grandi
E cargamento di cocaina di mas grandi di e ultimo 15 añanan, cu autoridad Spaño a logra intercepta riba lama.
Esaki ta resultado di un investigacion grandi den cooperacion cu entre otro organisacionnan di gobierno Mericano D.E.A. y cu organisacion policial NCA di Inglatera. Tres persona a keda deteni relaciona cu e cargamento enorme aki di droga.
Autoridad a intercepta zeilboot cu 3 mil kilo di cocaina
Recientemente polis spaño a intercepta un otro cargamento grandi di cocaina, esaki tabata riba un zeilboot mas o menos 900 kilometer leu di Azoren, riba e zeilboot aki nan a intercepta 3 mil kilo di cocaina. Varios sospechoso a keda deteni, entre otro e lider di e organisacion criminal aki cu ta un homber (60) di nacionalidad Hulandes, e la wordo aresta na Mijas cerca di Malaga. Nomber di e Hulandes aki a sali na cla durante un investigacion grandi di traficacion di cocaina. Aki ta trata di un organisacion criminal cu ta trafica cocaina for di Sur America pa Europa y e Hulandes deteni, lo tabata lidera e organisacion criminal aki.
Detencion di varios persona den e organisacion criminal
E organisacion criminal aki tabata trafica cargamentonan grandi di cocaina riba yate, zeilbootnan etc. nan tabata sali for di Sur America pa Europa. Autoridad spaño a bay den accion y a detene varios sospechoso, tabata trata di varios Hulandes di decendiente Turco, un persona di Zweden y varios persona di Latino America.
Operacion di polisnan di Spaña, Hulanda y Francia cu a inicia na 2019
E operacion di parti autoridad tabata un investigacion grandi cu a cuminsa na 2019, den e operacion aki tabata tin polisnan envolvi, di Spaña, Hulanda y Francia. E operacion tabata enfoca pa desenmascara tur persona cu ta envolvi den e organisacion criminal aki di traficacion di droga, durante e investigacion a bin sali na cla cu e organisacion tabata dispone di un netwerk grandi y cu via botonan, e cargamentonan di cocaina tabata drenta.
Zeilboot cu a sali for di Caribe intercepta cu 2500 kilo di cocaina abordo
Cuminsamento di oktober, durante un investigacion, un zeilboot a capta atencion di autoridad. Un zeilboot cu a sali for di Caribe y tabata bayendo Spaña. Riba 8 di oktober e boto tabata panort di Azoren. Aki autoridad a tene un accion riba lama y e zeilboot a wordo para y rista completamente. Abordo nan a bin topa cu 2500 kilo di cocaina. E dos personanan cu tabata abordo di e zeilboot a keda deteni.
Entrada Hudicial y a confisca placa, arma di candela, telefonnan y autonan
Mientras autoridad tabata riba e boto, autorida Spaño a tene un entrada hudicial na dos edificio na Mijas y Fuengirola (Spaña). Aki nan a detene tres miembro di e organisacion criminal, entre otro e cabesante di e organisacion. Polis a confisca un cantidad grandi di Euro’s cash, armanan di candela, telefonnan y autonan di luho.
E sospechosonan ta deteni y autoridad ta sigui investiga e traficacion grandi di droga for di Latino America pa Spaña.
