Decision Unilateral di Gobierno: Croes y Eman a falta respet pa Parlamento di Aruba.
E noticia cu a sali recientemente a haya hopi reaccion den comunidad. Gobierno di Aruba, bao direccion di Gerlien y Mike, a tuma un paso unilateral pa firma un acuerdo cu Hulanda tocante e ley di rijkswet “HOFA” pa regula finansas di Aruba. Un paso cu a tuma tur hende di sorpresa, incluyendo e Parlamento mes.
E ley no a wordo presenta na Parlamento pa consulta, ni pa opinion, ni pa buska sentimiento di e 21 parlamentarionan cu ta representa pueblo di Aruba. Na lugar di transparencia y respet, e gobierno a trata Parlamento manera si nan no ta existi: simplemente nan a informa cu ya e acuerdo a wordo firma, cu e ley ya wordo manda pa Hulanda, y cu proceso ya ta canando e proceso.
Esaki ta un forma di goberna cu no por keda sin wordo critica. Gerlien y Mike mester compronde cu Parlamento ta e maximo poder den nos pais. Ta e organo cu pueblo a eligi. Cualkier gobierno cu ignora Parlamento ta manca democracia y ta pone Aruba riba un peligro.
Esaki no ta solamente ta un falta di respet pa 21 parlamentario, pero ta un ofensa directo pa pueblo di Aruba. E mensahe cu e gobierno ta manda ta cla: “nos no tin respet pa voz di pueblo, nos ta sigui nos caminda, sin consulta, sin transparencia, sin dialogo.”
Un gobierno cu actua asina ta pone su autoridad riba e ley y riba e orden constitucional. Aruba no ta un colonia cu por wordo maneha sin consulta su representantenan. E actuacion di Croes y Eman y Wever ta mustra arogansia politico y falta di liderazgo responsabel.
Pueblo di Aruba tin derecho pa exigi:
Respet pa Parlamento; Respet pa democracia; Transparencia den decisionnan crucial; Y riba tur cos, un gobierno cu no tin miedo pa defende su posicion den cara di debate y critica.
Gobierno cu ta kere cu e por firma acuerdo sin envolve Parlamento ta perde credibilidad. Aruba mester wak cu wowo habri: nos ta na un cruce den nos historia politico. Sigui tolera esaki ta habri porta pa gobiernan di futuro pa elimina mas poder di Parlamento, y finalmente silencia voz di pueblo.
Gerlirn y Mike a yega na un limite: nan actonan no por keda sin consecuencia. Parlamento mester pone un paro firme y pueblo mester para dilanti pa defende nos democracia.
