Den sindicalismo tambe ta existi e codigo di bon gobernacion y cual mester ta na analogia di e pensamento den mundo politico, con e gobernante ta eherce su trabao ariba tereno politico den e mihor forma y tene cuenta cu reglanan democratico y otro reglanan di di decencia. Esakinan igualmente mester conta pa e lider sindical ora e ta eherce su funcion como lider. E funcionamento di e lider sindical mester ta na interes di e miembronan, di e clase trahador y di pueblo en general.
SEPPA tin su meta pa salbaguardia y promove e interes di su miembronan y nan famia. Tambe pa desplega=pone den practica e actividadnan economico, politico,social y cultural di su miembronan en particular y di e clase trahador en general.
Esaki cu e anhelo pa yega na bienestar total di su miembronan y logra e unidad bao su miembronan
Dirigentenan di SEPPA no ta cumpliendo cu e código di bon Gobernacion/Administracion.
E bon Gobernación/Administracion ta nifica cu lidernan mester respeta e constitucion=statutonan di SEPPA.
Pa loke ta democracia sindical, primordialmente mester respeta loke e statutonan di su sindicato ta bisa, aserca tin otro reglanan, laga nos yama nan e reglanan di decencia esta duna informacionnan correcto y completo, ora di eleccion. Democracia no ta algo opcional cu e aña aki o aki 3 aña ta cumpli cu ne y otro biahanan no. Pakico, pasobra democracia ta e fundeshi di nos estado di derecho social.
Den SEPPA, articulonan 10 y 15 ta papia bon cla ki ora y con ta tene eleccionnan.
E statutonan ta bisa cu cada 3 aña ariba e ultimo dia di e congreso anual ta tene e eleccionnan. Ora bo lesa e declaracion di sra M Brito pa loke ta e eleccion di 11 di juli 2025, e ta bisa cu ta congreso=delegadonan a pidi pa tene eleccion pa directiva. Pues sra Brito ta bay contra e constitución di SEPPA, no ta aplica e statutonan di SEPPA cualnan ta dicta con y ki ora, e eleccion ta tuma lugar. E posicion di delegadonan ta di comprende. Nan sa cu no tin directiva y hopi tempo no a tene eleccion, pesey nan peticion pa tene eleccion, pero esaki mester ta di acuerdo cu statutonan, no opcional manera por lesa for di declaracionnan di M. Brito, secretario general, kende ta kere cu e por hacie na un otro forma. E conclusión cu tur miembro mester saca ta, cu e elección di directiva SEPPA di 11 juli 2025 ta ilegal.
Siguiendo e statutonan y revistanan di fin di aña di SEPPA, claramente tur hende ta conclui cu for di e congreso anual di 2013 no a tene eleccion mas den SEPPA.
Awor ora analisa e posición di M Brito cu tin 25 aña como e líder máximo di SEPPA, No por . Un reaccion hopi tendí e ultimo tempo ta, cu e sra aki ta kere cu su interpretación di su elección como Secretario General di 12 aña pasa, ta “FOR EVER”.
Den SEPPA, Directiva mester controla e maneho di Comité Ehecutivo.
Otro asunto cu miembronan mester cay ariba dje ta e trabaonan di directiva y di Comite ehecutivo. Nos por bisa cu for di 5 februari 2010, SEPPA tin un structura profesional, unda tin un distinción=diferencia entre Directiva y Comite Ehecutivo. Sigur pa loke ta e trabaonan cu cada órgano mester cumpli cu nan. Dos organonan apart di otro. Den cierto sentido manera nos conoce na casi tur pais di mundo , esta un gobierno cu su ministronan kendenan ta ehecuta e trabaonan pa goberna y un parlamento pa controla e gobernación y acerca traha leynan. Den SEPPA esencialmente e ta igualito. Comité Ehecutivo cu ta haci e trabaonan manera reuni cu otro instancianan, negocia condicionnan di trabao pa su miembronan, atende asunto di miembronan y ehecuta otro trabaonan cu tin di haber cu e miembronan, importante ta pa duna información na miembronan, tambe e maneho financiero di e sindicato ta den man di e Comité ehecutivo.
E directiva di SEPPA, según articulo 19, ta controla e maneho hiba dor di e Comité Ehecutivo, special acento ta wordo duna na e control ariba e maneho financiero hiba dor di Comité Ehecutivo. Pa na final duna Decharge na Comité Ehecutivo, cual ta aproba y kita e responsabilidad di e maneho financiero hiba dor di e Tesorero y Secretario General.
Si no tin directiva no tin decharge duna, “mas claro no canta un gayo”, pues e Tesorero y Secretario General ta keda responsable y mester duna cuenta.
SEPPA tin un deficiencia democratico
Informacion cu nos tin ta cu desde 2014 e directiva eligi den congreso 2013 ya no a funciona optimalmente. Ora bo lesa e revistanan di SEPPA na final di aña 2016 te cu 2019, bo no ta lesa cu tabatin eleccion pa un directiva. Despues di 2019 no tin informacionnan di fin di aña. Solamente den prensa ta Sali invitación pa e brindis/fiesta di fin di aña. E revistanan ta papia cada biaha cu no tin candidatonan pa elección di directiva. Otro biaha e directiva cu no ta existi no a percura pa candidatonan y otro storianan cu no tin candidato. Lubidando cu ta trabao di Comité Ehecutivo (Secretario General) pa ehecuta e trabaonan aki. P.e. dor di saca informacionnan pa informa miembronan cu ta bay tene elección, ta rondea candidatonan. Ta bisa ki dia e elección ta y kendenan ta candidato. Nada no a sosode. Despues di 2019 nos como miembro no a ricibi revista mas. Pues lesando e revistanan di final di aña, for di 2013 no tabatin elección mas.
Akinan e rabo di porco ta krul. Con a para cu e decharge-nan, cu eleccionnan?
Laga nos yame den un forma bunita, SEPPA tin un deficiencia democrático=falta di democracia, sigur después di 2016.
Falta di democracia ta haci cu no tin control arriba e maneho di Comité Ehecutivo.
Hopi mahos!!!!!
Comparacion di e parlamentario de Meza kende ta haci trabaonan di ministro, cu e directiva di SEPPA (spiritu) cu ta ehecuta trabaonan di Comite Ehecutivo.
Ora nos haci comparación cu gobernación na Aruba awor aki nos ta wak un bon comparación.
M. de Meza, parlamentario según e líder di e partido berde den gobernación y di otro lidernan di e partido aki ta bisa cu awor ta e parlamentario M. de Meza ta bay ehecuta e trabaonan di e ministerio di Infrastructura, di Medio Ambiente y di Energia, cu parlamento a designa na Baba Herde, un persona cu estudio Universitario. Pues na Aruba no tin Trias Politica mas.
Mesun cos nos ta lesa for di e revistanan di SEPPA, varios aña tras di otro, cu no a haya e candidatonan pa directiva, awor nos ta lesa den Diario di 11 juli 2025, cu directiva ta bay den ehecucion di trabaonan hunto cu Comité Ehecutivo.
AYNOOO, AYNOOO, Aruba Quo Vadiz
Parce cu e miembronan di directiva di CAPA a suspende “COMMON SENSE”
Pa loke ta e caso cu Comision 11 a gana den corte, un hurista cu a wordo saca for di orden di Abogadonan a bisa comisión 11 cu directiva di CAPA ta bay cu e caso na Corte di Apelacion. Nos ta haya e siguiente situación:
- Den statutonan di CAPA ta poni cu directiva mester duna comision 11 e registro di miembronan;
- Jues den prome instancia a dicta cu directiva di CAPA mester duna Comision 11 e registo di miembronan;
- Den e ley cu ta para e reglanan concerniendo Asosacionnan di Cooperativismo na Aruba AB 1987 no. GT 8, bao articulo 11 tin mesun stipulacion cu Statutonan di CAPA. Pues, según e ley aki tambe ta dicta cu directiva di CAPA mester duna Comision 11 e registro di miembronan.
Directiva di CAPA no tin ningún chens di gana e caso den Corte di Apelacion. E tres puntonan menciona prome ta indica cu e miembronan di Directiva di CAPA no por pensa normal mas, nan no tin “Common Sense”. E registro di miembronan ta pa comision 11 tin nomber, adres y email di miembronan, pa nan firma e peticion na directiva di CAPA pa tene un reunion general pa duna informacionnan ariba e ladronicia di F 382.000,=. Manipula pa no entrega e registro di miembronan ta pone tur hende cu “dosplaca di tino” pensa, cu Tesorero M. Brito y directiva di CAPA tin cosnan scondi y ta sigui tarda e entrega. E hurista sigur lo wordo bon paga y e tesorero lo bisa cu e placa no ta Sali for di su saco, pero for di e cuentanan di miembronan di CAPA. Cu e ley, AB 1987 no. GT 8, den su articulo 21; lid a, ta bisa cu Violacion di e ley aki ta un sorto di delito cometi dor di dirigentenan di un Cooperativa. Den e caso aki, e miembronan di directiva di CAPA, por wordo castiga cu un multa si nan no cumpli cu e entrega di e registro di miembronan. Esaki sigur lo bira un petición di comisión 11 na Corte di Apelacion pa castiga e miembronan di directiva di CAPA, durante e tratamento di e caso di apelación.
Comision pa Restaura Democracia den SEPPA, C.R.D.S.
Teniendo cuenta cu tur e desviacionnan di e secretario General di SEPPA, e baymento tras di SEPPA, si nos tuma na consideracion:
- No tin un bon maneho di acuerdo cu e codigo di bon Gobernacion/administracion;
- Tin un deficiencia grandi di democracia;
- No ta respeta pa statutonan;
- Hopi aña, no tin directiva, pues no tin control ariba e maneho di Comite Ehecutivo;
- Hopi aña, no tin control ariba e finansas di SEPPA y no tin Decharge duna.
Pues e maneho di e Secretario General actual ta hibando SEPPA atras, dia pa dia. Sigur e tin e apoyo di + 5% di miembronan, su hendenan ront di dje. Pero e mayoria aplastante, cu ta miembronan conciente y cu ta pensa ta pidiendo cambio grandi den SEPPA. Miembronan conciente di SEPPA a lanta un comisión: Comision pa Restaura Democracia den SEPPA, C.R.D.S. Ora e temporada di vacacion pasa, e campaña ta bay start.
