E dianan ta malo, e tempo ta trabahoso, aumento di inmoralidad, falta di respet, malicia, crimen,adiccion, alcoholismo, hende grandi contra hende grandi, hoben contra hoben y mucha contra mucha, divorcio y division tur caminda, negligencia di mayornan y falta di respet di yiunan, ta pone hende su curpa cohe ril, pero den tur esaki,Dios ta comanda nos pa sigi haci bon.
Den e tempo cu nos ta biba aki, haci bon ta nifica bay contra biento, hasta hende lo critica bo y bisa cu bo ta kens, pero no worry cu hende sigi haci bon.
Y no laga di haci bon y comparti cu otro, pasobra sorto di sacrificionan asina ta agrada Dios.
( Hebreonan 13:16).
Finalmente boso tur sea di acuerdo cu otro,teniendo compasion cu otro,stimando manera ruman,y sea misericordioso y humilde den spirito. No pagando malo cu malo,ma mas bien dunando un bendicion,pasobra boso a wordo yama.pa e proposito aki,pa boso por hereda un bendicion.( 1 Pedro 3;8-9).
Amargura ta un di e strategianan mas usa di diabel actualmente, pasobra pa medio di amargura falta di pordon ta aumenta, curason ta sera, mente ta wordo domina, y salud mental ta wordo afecta.
Ma ken cu tin biennan di mundo,y ta mira su ruman den necesidad, y ta sera su curason pe,ta con e amor di Dios ta permanece den dje? Yui chikitonan no laga nos stima cu palabra, ni cu lenga, ma cu hecho y berdad.(1 Juan 3:17-18).
No haci nada cu actitud di egoismo, of orguyo,ma cu humildad , laga cada un di boso considera,e otro mas importante cu e mes. No busca boso interes personal so,ma busca tambe interes di otronan.* Filipensenan 2:3-4).
Esun cu tene misericordia di un hende pober, ta fia na Senjor, y E lo page bek pa su bon obra.(Proverbionan 19:17).
Esun cu sera su horea pa sclamacion di e pober,e tambe lo sclama ma lo no wordo contesta.( Proverbionan 21:13).
Un hende generoso lo prospera,y esun cu ta duna di bebe,tambe lo hanja di bebe.(Proverbionan 11:25).
Mundo a bira moderno , tur cos a bira digital, hende a perde contacto cu otro, bisinja ta malo den cas , pero e otro bisinja no sa. Pasobra e ta wardando un yamada di telefon di su bisinja, pero e bisinja ta asina malo cu e no por yama na telefon.Y pa e motibo ey cosnan ta pasa cu despues hende lo tin duele, pero nos a distancia hopi for di otro.
Durante coronavirus, mester a mantene distancia obligatorio, pero awor cu nos ta mas liber, laga nos bolbe bek na e contacto personal, e contacto cu mi mester mira e persona pa mi sa cu e ta bon.
Awendia tin un spirito di orguyo ta moviendo di hende cu ta bisa bo nan ta bon, pero nan no ta bon, nan ta sconde cos, despues nan ta bisa bo, mi no kier a molestia bo.
Awendia ora bo ta papia cu un adulto mayor , si ta posibel yame cu videocall anto asina bo por wak su situacion, pasobra dianan ta malo.
Mescos cu ora bo yiu sali, yame cu videocalll, pa asina bo por tin un bista na unda e ta, no cu esey ta mustra desconfiansa, pero esey tambe ta conta den seguridad cu mayor mester duna.
Tur momento cu ta na bo alcance saca man y yuda.
Tur caminda corda ,bo por duna un man,
Corda bon cu locual cu ta bon cu bo sembra awe, mayan cu Dios kier lo bo cosecha bon.
Haci bon na hende y spera bendicion di Dios, Dios mes lo paga bo.
Sinceramente, Pastor Marcel Balootje.
