Cada dia nos ta mira cu mas claridad, nos ta mira con mentiroso diabel ta, ora bo bisa un hende cu e ladron ta bini, solamente , pa horta, pa mata y pa destrui, hopi ta kere cu ta palabra religioso, of ta cos di misa of iglesia, of ta cos di hende di otro religion, y nan no kier confronta nan mes cu e berdad.(Juan 10:10).
Ora bo bisa un hoben, sea sobrio, vigila , tene cuenta, watch out, habri bo wowo, wak bo caya, pasobra diabel ta cana manera un leon cu ta grunja buscando ken e por devora, cu diabel ta nos adversario,( 1 Pedro5:8) hopi ta hari , hasta bisa bo cu diabel no ta existi.
Tur e cosnan ey e enemigo ta hinca den cabes di hende pa nan keda den scuridad, keda den inmoralidad, keda den droga y alcohol, keda kibra ley, keda den rebeldia contra mayornan, keda sin studia, y na final keda sin logra nada den bida, pasobra nan no a kere den e berdad Dios.
Ta tempo pa bo realisa cuanto Cristo Hesus ta stima bo!!!.
Prome cu bo sigi droga y bebe y parandia.
Prome cu bo sigi den inmoralidad.
Prome cu bo sigi den rebeldia contra bo mayornan.
Prome cu bo dicidi di haci danjo na bo curpa, y hinca bo famia den gran tristesa.
Prome cu bo dicidi di kibra bo matrimonio, cu hende cu no ta balora kico ta un matrimonio.
Prome cu bo sali na estado como hoben, y kere cu ta bo mayornan bo ta haci tristo.
Prome cu bo bay for di cas, pensando cu ta bo mayornan ta keda cu e berguensa.
Prome cu bo cana cu arma, pensa na horta y hasta yega asina lew pa comete crimen.
Prome cu pensa na kita bo mes bida.
Prome cu bo tuma cantidad di remedi, pensa cu lo bo muri, pero bo a keda mal afecta.
Prome cu bo sigi bebe sabiendo cu bo tin cu stuur pa bo yega cas.
Prome cu bo corre auto burachi, iresponsabel, sin seguro, sin rijbewijs.
Prome cu bo sigi cana den caminda di maldad, perversidad y abominacion.
Prome cu bo sigi den tur e cosnan ariba menciona pensa un rato cu bo ta haci danjo na bo mes.
Palabra di Dios ta bisa: Mi a stima bo cu amor eterno, pesey cu misericordia Mi a hala bo.( Jeremias 31:3).
No laga bo orguyo y arogancia domina bo, no laga diabel hunga Yoyo cu bo, no laga ningun hende ganjabo, pasobra ningun hende no por haci bofon di Dios, tur locual hende sembra nan lo cosecha.
Un mandamento nobo Mi ta duna boso,pa boso stima otro, y mescos cu Ami a stima boso,pa boso stima otro, na esaki tur hende lo sa cu boso ta Mi disipel si boso tin amor un pa otro.( Juan 13:34-35)
Duna gradicimento na Senjor pasobra E ta bon, pasobra Su misericordia ta pa semper.(Salmo136:1).
Di berdad, e misericordia di Senjor no ta caba,pasobra su compasion nunca lo faya,
Tur mainta nan ta nobo,grandi ta bo fieldad.
Mi alma ta bisa: Senjor ta mi porcion, pesey ta den dj’E mi ta spera.( Lamentacion 3:22-24).
Ni un hende no tin amor mas grandi cu esaki, cu un hende ta duna su bida pa su amigo nan. Boso ta Mi amigo , si boso haci locual Mi ta ordena boso.( Juan 15:13-14).
Mira ki un amor grandi e Tata a duna nos, cu nos por wordo yama yuinan di Dios, y esey nos ta.(1 Juan 3:1.
Sinceramente, Pastor Marcel Balootje
