WILLEMSTAD.- Diamars autoridad a tene control na un scol di VSBO na
Curacao, unda a kita algun hoben sunu sunu y pone nan buk, pa un
supuesto control mas riguroso. E forma con e control a bay, no
tabatatin permiso di docentenen ni mayornan. E alumnonan ta menor di
edad, cual acto tampoco a cay bon serca e propio alumnonan.
Studiantenan ta haya cu e control ta bergonsoso. Segun publicacion di
EXTRA, un studiante di 15 aña cu ta bishita Marnix VSBO na Cas Cora a
pasa den un experiencia amargo.
E hoben a conta cu mainta polisnan a yega dicho scol y a indica cu lo
tene un control riba arma y droga. Nan a cuminza controla tur mucha
den cada klas, mientras cu tambe tabata controla den nan tas. E scol
ta consisti di 500 mucha unda tur a pasa den e control aki.
Sinembargo e hoben a conta cu despues di a controla tur mucha den
klas, a saca algun mucha for di cada klas y a bay cu nan den area
separa.
Den e kamber separa, nan tabata hinca e hobennan “dos dos” den kamber
di docente pa un control mas riguroso.
E hóben a sigui conta cu ningun di nan tabata sa ta kico lo bay sosode
den e kamber. Unabes e muchanan a drenta e kamber, e polisnan a pidi
nan pa nan kita nan paña completo. Pues e muchanan a keda sunu sunu
dilanti di e polisnan y tambe dilanti di e otro mucha cu ta hunto den
e kamber. Ora nan tabata sunu, e polis a pidinan pa buk dos biaha.
Despues e polis a informa cu e motibo pa buk dos biaha sunu, ta pa wak
si algo lo cay abao.
E caso aki a hala masha atencion na Curacao, mirando cu e forma di
proceder di polis ta cuestionabel y hasta ta wordo rechasa. Mayornan
y muchanan no a keda nada contento cu loke a sosode y pesey a entrega
keho tambe contra di e polisnan cu a conduci e control aki.
