Den cuadro di e Common Good Conference, Departamento di Asunto Social ta comparti su rol central den promocion di bienestar social pa e comunidad Arubiano. E departamento ta traha diariamente pa brinda apoyo, informacion y orientacion na personanan cu ta pasa den momentonan dificil, cu enfoke riba proteccion y fortalecemento di e bienestar general.
Segun e departamento, e participacion den e Common Good Conference ta un oportunidad importante pa informa comunidad riba loke diferente organisacion ta haci pa e bon comun, y pa mustra con colaboracion ta fortalece e impacto di e trabou social riba Aruba.
“Nos ta para pa trese apoyo na momentonan dificil y pa informa comunidad riba e servicionan cu ta disponibel pa bienestar di nos tur,” segun Marceylaine Paskel di Departamento di Asunto Social.
Un punto importante di e participacion ta e enfoke riba ‘Nos t’ey pa bo’, un iniciativa cu ta invita comunidad pa busca informacion, orientacion y apoyo ora nan mester. Segun e departamento, e conferencia ta un espacio ideal pa duna visibilidad na e servicio aki y pa motiva hende pa uza e recursonan cu ta disponibel na comunidad.
Departamento di Asunto Social ta invita e comunidad pa ta presente durante e Common Good Conference, pa asina keda bon informa riba e trabou haci pa bienestar social, y pa conoce mas di cerca, con e departamento y otro organisacionnan ta contribui na construccion di un Aruba mas solidario y resiliente.
“Departamento di Asunto Sosial ta para pa bienestar di nos tur.”
Pa medio di e conferencia, e departamento ta reafirma su compromiso cu e bon comun y cu e responsabilidad comparti pa cuida y fortalece e comunidad Arubiano.
