E aña aki un bes mas ta dedica e luna di April na conscientisacion ariba e tema di Abuso di Mucha na Aruba. Pa medio di e campaña di “Cende e Luz Blauw”, ta trata pa trece conscientisacion riba e importancia pa nos muchanan lanta den un ambiente sigur, cu amor y asina preveni abuso di mucha den nos comunidad.
Diferente organisacion a bay ta uni nan mes na e campaña aki y nos departamento sigur no ta un excepcion. E aña aki, Departamento di Asunto Social a scohe pa ilumina su oficina na Lagoenweg na Playa cu un luz blauw – un simbolo internacional di prevencion di abuso mucha.
Cu e acto simbolico aki e departamento ta demostra di ta sostene e lucha pa defende e derecho di cada mucha y ta traha duro pa un futuro sin abuso.
Departamento di Asunto Social ta convenci cu: “Prevencion di abuso di mucha ta un responsabilidad di tur hende! Y p’esey ta pidi comunidad henter pa sea alerta riba e diferente siñalnan di un mucha; pa kere semper loke e mucha ta bisa y pa laga un mucha solamente den man di un hende di confiansa.”
Hunto, nos ta pone luz riba e realidad duro, y hunto, nos ta lanta un muraya pa proteha e futuro di nos muchanan!
