Den curso di e dianan cu a pasa Departamento di Aviacion Civil (DAC) a atende algun reunion importante na Hulanda.
E prome reunion tabata un reunion internacional di ICAO cu ta regarda e proceso di investigacion di accidentenan aereo. Aki, particularmente, a elabora riba un rekisito nobo cu ta regarda comunicacion cu y e opvang di familiaresnan durante y despues di un desastre aereo. Esaki awor a bira un norma mundial cu Aruba tambe lo mester bay cumpli cune. E intencion ta pa den futuro cercano bin cu entrenamento y proceduranan pa cu e tema aki na Aruba.
E segundo reunion tabata cu e Departamento di Inspeccion di Hulanda (“Inspectie Leefomgeving en Transport”)(“ILenT”). Durante e reunion aki a elabora riba diferente manera pa DAC y IlenT fortifica nan cooperacion tecnico, y traha mas estrecho en conhunto. Tambe DAC a firma un acuerdo di cooperacion tocante inspeccionnan di rampa, segun e normanan Europeo di “SAFA” (“Safety Assessment of Foreign Aircraft”). E acuerdo aki ta encera cu Aruba ta forma parti oficialmente di e “netwerk” di SAFA. Inspeccionnan di rampa haci na Aruba door di inspectornan di DAC ta wordo reconoci como ekivalente na inspeccionan haci na hulanda y tambe tur pais miembro di Union Europeo cu ta forma parti di e SAFA-netwerk. E resultado di inspeccion di avionnan haci na Aruba lo wordo hinca den e database di SAFA, cu tambe ta contene tur inspeccion haci door di tur otro pais miembro di SAFA. DAC tambe tin acceso na e database correspondiente di tur e inspeccionan aki, loke ta yuda Aruba pa haci su inspeccionnan mas efectivo y eficiente, a base di data y analisis di riesgo. Aruba ya caba tin algun aña ta haciendo inspeccionnan segun e normanan Europeo di SAFA y su inspectornan ta cualifica caba den e sistema aki. Sin embargo, awor esaki ta keda oficialisa door di firmamento di e acuerdo. Di otro banda, awor Aruba tambe lo ta den posicion pa yuda Hulanda, ora mester, pa haci inspeccionnan di rampa den Caribe Hulandes. Esaki ta ilustra cu e acuerdo aki ta un acuerdo di cooperacion mutuo unda tur dos partido ta beneficia di dje (“win-win”). Esey ta e manera con DAC ta fortificando su mes alabes di cooperacion mutuo cu partnernan strategico.
E tercer reunion tabata e “Vierlandenoverleg” entre e cuater directornan di aviacion civil di e paisnan den Reino, yama “Regiegroep Luchtvaart”. E reunionnan aki ta tuma lugar cada 6 luna y diferente temanan di interes mutuo, regardando tur area den e mundo di aviacion, ta wordo trata. Puntonan discuti ta, entre otro, desaroyonan den aviacion riba nivel local, preparacion pa un eventual auditoria di ICAO, conectividad, aviacion sostenibel, search & rescue, harmonisacion di leynan, intercambio di inspectornan, vuelonan cu aeronavenan sin piloto (“drones”), y mucho mas.
Durante e reunion aki DAC a firma un protocol cu ta encera cooperacion estrecho entre e 4 paisnan tocante supervision riba siguridad operacional den nos espacio aereo. Tambe ta trahando en conhunto riba un proyecto di apoyo pa studiantenan cu ta core stage of ta “studeer af” den e ramo di aviacion. Pa e motibo ey, DAC ta haci un suplica na tur studiante di Aruba, cu ta studiando specificamente den e ramo di aviacion, cu mester di apoyo pa stage of “studeer af”, pa tuma contacto cu DAC na dca@dca.gov.aw.
DAC ta mira bek riba un siman di reunionnan exitoso y lo sigui haci tur cos den su poder pa por garantisa e siguridad y sostenibilidad di Aruba su infrastructura di aviacion civil, mirando e importancia di esaki pa nos turismo.
