Luna di november a drenta y Departamento di Mucha y Hoben (DMH) a ranca sali cu diferente presentacion inspirativo y educativo, poniendo enfasis y enfoke riba e luna cu ta promove y duna contenido real na; Derecho di Nos Mucha y Hoben na Aruba.
Dia 1 di november, lider di proyecto pa sector di enseñansa, Jullie-Ann Kraaijkamp Thode a haci un presentacion di Codigo di Proteccion (CdP) na e futuro maestronan di Aruba, di klas 2 y 3 di IPA. Codigo di Proteccion ta un di e articulonan di e Tratado Internacional di Derecho di Mucha, esta articulo 19, cu ta boga pa pais Aruba tin un sistema di proteccion y siguridad cu cada mucha y hoben tin derecho riba dje. E presentacion aki tabata posibel, danki na e iniciativa como peticion special di e team di docente di IPA; Darelyne Maduro, Marise Maduro y Gyseth Nuesch, cu ta mira e importancia pa e studiantenan tin conocemento di e contenido di e decreto nacional: Codigo di Proteccion. Tabatin participacion di alrededor di 30 studiante.
Banda di haya e conocemento di e contenido di Codigo di Proteccion, a percura pa brinda mas herment di conocemento tocante kico tur un maestro mester atende y tene cuenta cu ne den nan futuro profesion. E studiantenan a participa activamente y tabata lansa nan preguntanan critico, manera; ‘Kico ta e posibel peliger y/of menasa cu nan por encontra, na momento cu nan tin sospecho di abuso di mucha den klas.
E ambiente tabata uno habri, unda a logra comparti varios sugerencia facil y practico, tocante con por señala concretamente den e tipo di situacion di peliger y/of menasa. Tambe a duna sugerencia tocante algun tips practico, tocante con por atende y ehecuta combersacion mas desafiante cu e mayornan en cuestion.
Na final por a conclui cu e mainta tabata uno sumamente exitoso y cu a habri caminda pa sigui traha hunto, na un contenido hopi mas concreto y duradero den e curiculo di IPA. Esaki ta netamente e pasonan necesario cu mester cuminsa pone, pa garantisa y salvaguardia conhuntamente e decreto nacional di Codigo di Proteccion, cu ta traha na un forma structural, uniforme y nacional riba prevencion di abuso y/of maltrato di mucha y hoben.
