ORANJESTAD; Diahuebs ultimo Minister Endy Croes a reuni cu sra. Audrey Tromp – Wouters y sr. Juan Maduro di departamento encarga cu idioma di departamento di enseñansa. Durante e reunion e Mandatario a haya un presentacion extenso di e importancia pa tin un instituto di idioma na Aruba pa salvaguardia Papiamento.
Idioma Papiamento ta forma un parti di nos indentidad mescos cu nos Himno, Bandera y Escudo. Meta y tareanan di un instituto ta entre otro maneho di idioma nacional y cuido y desaroyo di Papiamento. E instituto lo atende cu trabounan linguistico, produccion di obra literario, material di sosten, trabounan di maneho di idioma nacional, cuido y desaroyo di Papiamento.
Durante e reunion a pidi cooperacion di Minister Endy Croes pa lanta e instituto mas pronto posibel. E Mandatario a compronde e importancia di e instituto aki pa nos pais y lo traha riba nan peticion.
