Ombudsman di Aruba, mr. sra. Jurima Bryson, a manda un carta di preocupacion (zorgenbrief) pa Minister di Enseñansa y Deporte, mr. sra. Gerlien Croes tocante e manera cu resultado di examen den enseñansa secundario na Aruba ta wordo anuncia publicamente.
Aunkue e practica a bira un tradicion cultural caminda cu celebracion tin un lugar importante, Ombudsman a ricibi señalnan cu algun forma di anuncio publico tin consecuencia negativo pa studiantenan cu no a logra slaag of cu ainda ta den incertidumbre tocante nan resultado.
Segun Ombudsman, derechonan y interesnan di mucha mester ta central den e proceso di anuncia resultado di examen. Esaki ta inclui derecho riba privacidad, dignidad humano y bienestar psicosocial. Un gran parti di e candidatonan di examen ta menor di edad, locual ta haci cu e Tratado Internacional di Derechonan di Mucha (IVRK) tambe ta relevante.
Ombudsman ta indica cu anuncio publico por haci cu studiantenan cu no a logra slaag por wordo identifica directa of indirectamente. Esaki por causa sentimento di berguensa, stigmatisacion y presion emocional. P’esey Ombudsman ta considera importante pa comunica resultado di examen prome individualmente y na un manera confidencial na e alumno y su mayor of respresentante legal.
Den e carta di preocupacion, Ombudsman ta presenta varios recomendacion na minister Croes. Entre otro, e ta recomenda pa desaroya un maneho uniforme pa anuncia resultado di examen, cu interes di mucha, privacidad, dignidad y bienestar como base. Tambe ta recomenda pa participacion den celebracionnan publico ta boluntario y pa scolnan promove mas conocemento tocante derechonan di mucha y proteccion di privacidad.
Mas informacion tocante e tema aki ta disponibel den e carta di preocupacion tocante e manera di publicacion di resultadonan di examen den enseñansa secundario. E carta completo ta disponibel riba website di Ombudsman, www.ombudsman.aw/pa/publicacion/.
Keda na altura di tur desaroyo
Bureau Ombudsman ta mantene comunidad informa via e siguiente canalnan di comunicacion:
- Website: www.ombudsman.aw
- Facebook: Ombudsman Aruba
- Instagram: ombudsmanaruba
- LinkedIn: Ombudsman Aruba
