No tin nada mas ferfelu y mahos ora cu dos hende ta casa y nan no ta confia otro.
Ningun relacion,no por wordo construi riba desconfiansa, pasobra no tin trankilidad, no tin pas, y bo no sa kico bo por spera.
E enemigo ta contento ora e por sembra desconfiansa den un matrimonio, of ora e pareha mes a habri porta pa desconfiansa drenta.
E ta un situacion hopi laf, pero cu semper tin alternativa cu por yuda drecha e relacion y pone tur cos bek na normalidad.
Pasobra ora desconfiansa drenta e momento ey bo tin cu realisa, si bo ta riba un berdad, of bo ta bao di atake di enemigo cu a bini solamente pa horta , pa mata y pa destrui.
Si bo ta riba un berdad, bo tin cu atende cu sabiduria, pa solucion, y no pa division, pasobra bo tin cu sinja lucha pa locual cu bo tin, y e mihor manera ta pa pone tur cos den man di Dios.
No cuminsa bringa carnal pasobra e asunto ta bira pio, pero cuminsa dobla bo rudia, y pone tur cos den man di Dios y laga Dios bringa pa bo, esaki ta conta pa tanto homber of muher.
Pa cuminsa Proverbionan 6:16-19 ta papia cu Dios ta odia mentira y orguyo, aki nan nos tin di comprende cu prome cu cos cu bo tin cu haci saca mentira for di bo boca, y cuminsa anda cu berdad, pone orguyo un banda y cuminsa cana den humildad asina bo por vence e flecha di e enemigo.
Efesionan 4:25 ta bisa : Pesey poniendo mentira un banda, cada un di boso, papia berdad cu otro, pasobra nos ta miembro di otro.
Genesis 2;24 ta corda nos cu e homber lo bandona cas di su mama y su tata,y lo uni cu su muher y cu nan lo ta un solo carni.
Un solo carni ta ehempel di respet, amor , disiplina, dedicacion, pordon y tolerancia.
Pasobra e base di matrimonio,ta tur locual,nos a menciona.
Colosensenan 3:9 ta bisa no ganja otro, como cu boso a pone un banda e homber bieu y su practica malbado.
Asina den un matrimonio, yega den un estado di desconfiansa, cu un homber tin cu coba den telefon di su muher of e muher tin cu coba den telefon di su homber, e desconfainsa a avansa y diabel a drenta, y nos tur sa cu diabel no ta cana su so, asina cu un drenta hopi mas ta drenta hunto cune.
Corda bon cu confiansa ta fundeshi di Matrimonio, y mentira y deshonestidad ta kibra e fundeshi.
Berdad ta trece union, mentira ta lanta muraya di division.
Di berdad cu tin hopi tentacion, pero nos mester keda cu wowo fiha riba Cristo Hesus, pa asina nos mente wordo renoba y nos no wordo influencia pa e sistema di mundo cu cada dia ta bira mas liberal y ta perdiendo temor di Dios, laga nos keda para riba e boluntad perfecto di Dios, y asina nos ta agradabel den bista di Dios.
Matrimonio ta e cuna di educacion pa famia, ta riba nos matrimonio nos yuinan ta wak, si nos matrimonio ta kibra, nos yiunan lo lanta desanima, cu falta di curashi pa enfrenta bida, pero ora nos ta percura pa somete nos mes na Dios, nos matrimonio lo ta stabiel, y nos yiunan ta wordo bon alimenta, den desencia, amor, disiplina y berdad, pasobra locual un mucha mira su mayornan ta practica e tambe lo haci mesun cos.
Laga berdad y e amor prevalece, tur momento.
Sinceramente, Pastor Marcel Balootje
