Dede 1 di september 2021 tin un ley nobo cu a drenta na vigor na Aruba.
Esey ta “erfrecht”, ley cu ta regula herencia y ta dicta ken ta herederonan.
Prome cu September 2021, herederonan di un fayecido ta bira su esposa/o y su yiunan.
Depende cuanto yiu tin, ta determina con grandi nan parti ta mientras e esposa/o na bida ta haya 50% + een kindsdeel.
E ley bieuw tabata dificulta e asuntonan pa e esposo/a cu a keda na bida. Pasobra yiunan por a reclama nan parti y esey por a obliga un benta tuma lugar.
Esaki por trece instabilidad pa e esposa/o cu a keda na bida.
Desde 1 september 2021, e unico heredero ta bira e esposo/a cu keda na bida. E ta dispone di tur cos y por dicidi tambe riba tur cos. Yiunan ta haya nan derecho, pero no por exigi nada mientras cu e esposa/o ta na bida.
Pues, esey ta regla awor automatico den ley cu desde 1 september ta na vigor.
Si bo persona tin un otro deseo, con pa reparti bo bienesnan, e ora bo mester acudi na un notario pa regla esaki via un testament.
Por ehempel; si bo ta separa di bo esposa, pero no a divorcia ainda, esey ta haci cu bo esposa ta hereda tur bo bienes.
Kisas bo kier laga cierto proteccion pa bo yiunan? Tur esey por wordo regla awor.
Bida ta cortico, despues di morto, problema por cuminza! Regla bo asuntonan awor.
