Un deseo personal di un pashent a hiba na Aruba na un desaroyo hopi mas amplio den cuido di salud. Motibo tabata un señora den su ultimo fase di bida cu no tabata kier a pasa su ultimo dianan den hospital, sino na cas, den su mesun ambiente conoci, rondona pa su sernan keri. Den hospital tabata mantene su dolor insoportabel bao di control cu un pomp di morfina. Como cu e tratamentou aki no tabata disponibel na cas na Aruba, el a dicidi toch den tur modo di bay cas, a pesar di e conocemento cu lo a duna un poco tempo prome cu otro medicacion di dolor lo tabata suficientemente efectivo. Fundashon Ultimo Deseo Aruba (FUDA) a haya e oportunidad di cumpli cu su deseo y a hib’e cas.
E experiencia aki a haci dolorosamente cla cu na Aruba un link importante ta falta den e cuido paliativo. Mientras cu den hopi otro pais ya pa varios aña caba ta haci uzo di pompnan di infuus portatil cu cual pashentnan por wordo trata na un forma sigur na cas, e posibilidad aki no ta existi ainda na Aruba. Loke inicialmente tabata parce un situacion individual, den realidad a resulta di ta parti di un problema mucho mas amplio y structural.
Pa e motibo aki, Fundashon Ultimo Deseo Aruba (FUDA) a tuma e iniciativa pa lanta un grupo di proyecto multidisciplinario, consistiendo entre otro di specialistanan medico, dokternan di cas, boticario, enfermeronan y otro profesionalnan di cuido. Conhuntamente nan ta traha riba solucionnan pa haci combation di dolor specialisa via pompnan di infuus na un manera responsabel posibel tambe den e situacion na cas.
E problematica aki ta existi ya pa varios aña caba y no ta e resultado di un solo incidente. E obstaculonan mas importante ta den e falta di un base legal adecuado, e financiamento di e forma di cuido aki y e desaroyo mas amplio di experticio den e cuido na cas. P’esey e grupo di proyecto no ta traha solamente riba un solucion practico, sino tambe riba e legislacion necesario, normanan di calidad, formacion y implementacion.
Den e ultimo periodo, e grupo di proyecto a sostene combersacionnan constructivo cu entre otro Minister di Salubridad Publico, conseheronan di maneho, henter e directiva di hospital, AZV, Inspectie Volksgezondheid, Directie Volksgezondheid, Kwaliteitsinstituut Gezondheidszorg, Directie Ouderenzaken y Presidente di e Comision di Salubridad y Cuido di Anciano di Parlamento. E urgencia di e topico aki ta wordo reconoci ampliamente y e iniciativa a ricibi atencion caba riba diferente nivel.
E grupo di proyecto ta expresa su aprecio pa e disponibilidad di tur e organisacionnan envolvi pa pensa hunto riba e desaroyo aki. Na mes momento e ta pidi pa diligencia. Cada pashent merece acceso na cuido paliativo adecuado na e luga husto y na e momento husto. E legislacion nobo ta ofrece un oportunidad unico pa haci combation di dolor specialisa via pompnan di infuus posibel den e situacion na cas. Cu esaki Aruba por duna un paso importante pa un cuido paliativo duradero, centra riba e ser humano y di un calidad halto.
Pasobra finalmente ta trata di algo hopi simpel: duna hende e posibilidad na un manera humano pa, ora cu esaki ta medicamente responsabel, pasa nan ultimo fase di bida na e luga caminda nan ta sinti nan mes mas comodo, den nan mesun ambiente conoci, rondoná pa e hendenan cu nan ta stima y sin cu nan tin cu sufri dolor insoportabel. E grupo di proyecto no ta para y ta sigui pidi atencion na tur e instancianan envolvi pa yuda haya un solucion. Y nan ta spera cu e problema aki den un tempo cortico lo pertenece na pasado.
