Continuando su relato riba e reunion explosivo di AVP, e abogado y ex-parlamentario Desiree Croes a duna mas detaye tocante e ambiente tenso y e consecuencianan di su confrontacion na aña 2022. Segun Croes, el a ser ataca pa “amigo y enemigo” pa su reaccion, pero el a keda firme pa loke e ta kere aden.
El a aclara cu e unico cos cu el a bisa na e persona (sin nombra) tabata e palabranan exacto: “bo tin lange tenen.”
Desiree a describi e reunion como uno masha fastioso, cu hendenan gritando, “hopi heftig,” y hasta yorando y temblamento di man, cu a causa cu algun persona a lanta y a bandona e sala.
Pa su sorpresa, despues di e evento, rumor a cuminsa plama rond cu ta e mes a saca Gerlien for di partido. Croes a considera esaki como “ridiculo,” y a bisa cu e mester a hari pa e locura di e palabranan. Sinembargo, el a agrega cu mas di 70% di e hendenan presente na e reunion a bise, “Abo a bisa loke nos tur a pensa,” y el a bisa cu e tin pruebanan den mensahenan di WhatsApp.
Desiree a termina su relato, comparando e situacion cu un “drama politico” unda algun hende ta actua amigabelamente pero ta pensa cosnan hopi mas pio. El a enfatisa cu e lo prefera un hende cu ta honesto y ta bise algo den su cara, mescos cu e mes a haci. El a subraya cu el a defende e lider di partido y otro hendenan den e reunion cu awe no ta defende, pero el a laga sa cu e no tin mester di nan pa haci esaki.
