Den e conclusion di su relato via video riba Facebook, e abogado y ex-parlamentario Desiree Croes a duna un splicacion final di su actonan y a lansa un critica skerpi riba e situacion politico actual. Croes a bisa cu el a haci loke el a haci pasobra el a lanta asina, sin acepta un falta di respet di ningun hende. El a duna un bista mas profundo den e drama, referiendo na un famia Croes cu semper a keda rabia pa motibo di un ex-parlamentario cu a mester a sali for di Parlamento. El a bisa cu maske su famia a para tras di nan, e ta un caso di “Stank voor Dank.”
Croes a uza gran parti di e video pa defende su nomber, nengando categoricamente cualkier acusacion, manera di a horta, falsifica diploma of cu su casa tabatin arma of a bende droga.
El a declara cu “nada di e cosnan ey a pasa den mi bida” y cu e unico cos cu el a haci ta defende un persona y para contra un falta di respet. Un biaha mas, el a mustra cu un minimo di 70% di e hendenan presente na e partijraad di AVP na 2022, a bise cu el a bisa loke nan tur tabata pensa.
Na final, Desiree a comparti su opinion riba e situacion politico actual, yamando e mocion di MEP un wega politico “transparente.” El a critica e fraccion di AVP pa a “trapa aden” y a mustra cu nan ta actua for di miedo di perde nan stoel. El a termina su relato, retando e gobierno pa splica kico nan a haci bon den e ultimo 7 pa 8 lunanan, den un intento di mustra con nan ta paralisa pa miedo.
