Den e ultimo capitulo di su relato publico, e abogado y ex-parlamentario Desiree Croes a continua su critica, enfocando awo riba e fraccion actual di AVP. El a cuminsa su relato, bolbe a enfatisa cu semper el a para pa su mes: “Nunca mi tabatin mester homber of muhe pa defendemi… Mi ta defende mi mes.” E tambe dirigi un mensahe na e persona (Gerlien Croes) cu a papia di “dolor”, bisando cu si e sa mita di loke el a pasa aden, e mester a sinti berguensa.
Desiree a sigui, referiendo na un mocion di MEP recien durante un reunion di presupuesto supletorio. El a califica e mocion como un “wega politico” asina bisto cu e ta “transparente”. Segun Croes, e fraccion di AVP a “trapa aden” cu “open ogen” y a demostra un falta di hurista. El a expresa su desapunto, ya cu nan no a tuma e tempo pa yam’e pa conseho, aunke e tabata un di e conseheronan di fraccion pa basta aña.
Desiree a atribui e accion di e fraccion na un solo motibo: “nan tin miedo di perde e stoel.” El a contrasta esaki cu su propio tempo den Parlamento, unda el a actua sin “ruggestakken” y sin sigui ningun opdracht. Croes a reconoci e habilidad politico di Prome Minister Evelyn Wever-Croes, bisando, “hopi bon hunga Evelyn, el a logra tambe. Slim.” El a subraya cu hopi cos lo por a wordo evita si tabatin comunicacion.
Croes a termina su relato, mandando un palabra di danki na Mike de Meza, kende el a bisa cu no a haya instruccion di con pa vota y a opta pa vota cu su curason. “Mike conoce mi,” el a conclui.
