Despues di 3 aña y mei di investigacion den RDA, porfin diahuebs mainta 8.or, e rapport forensico a wordo entrega na Promer Minister. E rapport a tarda demasiado hopi! Ta trata investigacion di hortamento cu a tuma lugar di placa di pueblo den RDA, den temporada di Gabinete di Mike Eman.
Gobierno di Eman a tuma bek e refineria for di Valero, y a entrege den man di RDA, cu na su turno a cera contract di huur cu Citgo. E projecto di Citgo a fracasa, pero durante un temporada a haci pagonan na RDA. E fondonan aki no tey. Nan a somenta of nan a vapora den aire.
Varios di e amigonan di Mike de Meza ta envolvi den e vaporacion di placa aki, pero tambe e politico Richard Arends, kende a manda cobransanan exageradamente halto, cu ta dal den miyones di florin. Mas peor ta cu el’a tuma un trabao na RDA, pero a keda paga su compania Horizon.
Tambe tin fiestanan cu a wordo haci cu DESTRA, unda a tene conciertonan cu a costa 1 miyon florin.
Tambe tin nomber di companianan di mercadeo, radio emisoranan, promocion na cantidad, tur sorto di campañanan cu a costa miles di florin.
E rapport lo mester trece na claridad, cierto pagonan cu a tuma lugar, pero cu despues a somenta.
Despues di 3 aña y mei, porfin diahuebs, Promer Minister a informa via radio Power FM, cu e lo haya e rapport pa 8.or di mainta, diahuebs mainta.
Parlamento tambe lo haya e rapport aki, como tambe Ministerio Publico, pa asina tuma pasonan legal y penal contra esnan cu a haci nan mes culpabel na horta placa di e compania.
