Mike Eman a sali recientemente den un reunion publico di parlamento pa pidi gobierno actual pa corta 10% di gasto di e departamentonan gubernamental.
Pero e realidad ta cu durante su propio gobernacion, el’a aumenta gastonan publico di forma feroz, hincando Aruba den un situacion finansiero dificil.
Durante e añanan cu Eman tabata gobernando, gasto di gobierno a subi enormemente, sin un plan cla pa stabilisa e finansas di Aruba. Awor, como futuro gobierno, e ta papia di austeridad y ta duna lectura riba corta gasto, manera si e mes no tabata e mesun persona cu a crea hopi di e problema financiero cu Aruba ta enfrenta awe.
E contradiccion ta cla: si Eman tabata kere den un gobernacion cu ta gasta na manera responsabel, dicon e no a praktike mesora ora e tabata poder?
Ora e tabata na poder, Hulanda a rechasa su presupuesto, cu tabata inrealistico. Gastonan tabata “sky is the limit”. Pesey mes el’a haya un KB na juli 2014 y bao welga di hamber.
Aruba mester lidernan di principio y consequente, i no politiconan cu ta cambia di opinion segun e situacion.
Su acto den parlamento ta inreconosibel. Den pasado el’a lesa buki di Paul Krugman; gasta mas! Sinembargo awor el’a presenta un plan ad-hoc pa corta 10% den tur departamento.
