Diamars atardi, despues cu autoridad a detene dos sospechoso na Alto Vista relaciona cu bendemento di droga, a haci dos entrada hudicial. Un na Casibari y e otro na Sero Biento.

For di basta dia caba autoridad lo tabata vigila y sigui algun persona cu lo ta biba of ta frecuenta e casnan aki pa asunto di bendemento di droga. Awe tardi na Alto Vista autoridad a detene dos persona, esaki despues di a siguinan.
Despues cu autoridad a detene e dos personanan aki, nan a haci dos entrada hudicial.

E Project Team Drugsbanden di polis, hunto cu ministerio publico a drenta na e dos adresnan aki. Un cantidad grandi di diferente tipo di droga a wordo confisca y tambe un cantidad grandi di placa cash.

Dos persona mas a keda deteni, un na e cas na Casibari y tambe na e cas na Sero Biento un persona mas a wordo deteni. Por bisa den e accion exitoso di Project Team Drugspanden a logra pone man riba 4 sospechoso relaciona cu bendemento di droga. No ta descarta e posibilidad cu mas detencion lo por cay.

E Project Team Drugspanden, ta un projecto cu a wordo lanta pa asina trata na combati e bendemento di droga na casnan den barionan. Segun nos a compronde cu tabata tin un aumento drastico den bendemento di droga na casnan, den barionan y esaki ta causa basta molester na e habitantenan den e diferente barionan.

Ministerio Publico tambe a haya esaki preocupante. Den un cooperacion entre Ministerio Publico y KPA, a cuminsa cu e projecto aki y por bisa cu e ta logrando hopi bon resultado. Tambe e team aki ta traha hopi cerca cu afpakteam. Si acaso constata cu un persona no tin un entrada, pero tin hopi articulonan valioso den su poder, esakinan lo wordo confisca. Project Team Drugspanden ta haya su informacionnan via tipnan, di habitantenan cu ta señala cosnan straño den nan bario of hopi biaha via tiplijn y asina e team ta cuminsa build un caso.

Si bo sa di casnan caminda tin bendemento di droga por duna e informacion aki na polis of via e tiplijn 11141.

LEAVE A REPLY

Please enter your comment!
Please enter your name here